Seraphic Choir hun a thleng ta
Ṭhazual Fakna chart-ah Seraphic Choir hun a thleng a, an hla 'Hnehna Lallukhum' chu pakhatna an rawn nihpui. Pensy 'Ka tan Krawsah ngei chuan' chu pahnihna a ni thung a, Lalbiaktluanga (Btea) 'Fak tlak I ni' chu pathumna a ni bawk.
Pakhatna Seraphic Choir 'Hnehna Lallukhum'
Ṭhazual Award 2019-a Best Duo/Group award latu Seraphic Choir-te hian 'Hnehna Lallukhum' hi March thlaa an tihchhuah tawh kha a ni a, Ṭhazual Fakna chart-ah hian a mikhual tawh lo hle.
Top 3-a an lanna pawh a rei tawh a, pakhatna dinhmunah hian an ding thuai dawn nia a lan laiin hun eng emaw chu Top 5-ah hian an kual an kual a, tunah erawh pakhatna an rawn ni ta a ni. Chart hmasaah khan pahnihna a ni a, tun chart-ah erawh tluk zo an awm ta lo.
Dr Jolene Lalsangkimi hla lehlin 'Hnehna Lallukhum' hi hla ṭha leh mawi tak a nih piah lamah music video pawh a hmuhnawm hle a, Seraphic Choir-te'n pakhatna an nihpui pawh hi a mak lo hle. Fakna chart-ah hian an la inlan rei deuh a nih pawhin a mak lo ang.
Chuai thei lo Pensy
Chart hmasaa pakhatna Pensy hla 'Ka tan Kraws-ah ngei chuan' chu pahnihna a ni ve thung. Pensy hi Mizo Gospel music scene-ah kum 10 chuang lai a hmel kan hmuin a zai kan ngaithla tawh a, chuti chung chuan a zai ngainatu an la tam a, a la vul dawn chauh niin a lang.
Lalbiaktluanga (Btea) hla 'Fak tlak I ni' pawhin hma sawn zelin pathumna a rawn ni ve leh ta bawk.
Fakna chart top 10 an ṭha rual
Bethsy Lalrinsangi chuan chart No.1 ah zawna vawi hnih lai a nihpui tawh 'Isua nen chuan' chu palina a la nihpui thei a, Maruati ft Rla 'A hnai reng Isua' chu pangana a ni ve bawk. Tun ṭum Ṭhazual Fakna chart-a rawn langte hi an ṭha rual hle a, Top 10-ah hian Dr Zoa, Hmingtea Chhangte leh One in Christ-te pawh an la awm a ni.
ṬHAZUAL FAKNA TOP 10:-
1 Seraphic Choir - Hnehna Lallukhum
2 Pensy - Ka tan Krawsah ngei chuan
3 Lalbiaktluanga (Btea) - Fak tlak I ni
4 Bethsy Lalrinsangi - Isua nen chuan
5 Maruati & Rla - A hnai reng Isua
6 Dr. Zova - Ka puang zel dawn
7 Sanga Renthlei - Lal Isua duhawm ber
8 Hmingtea Chhangte - Hun duhawm
9 One in Christ ft. Isaac Hnamte - Fak hla rimawi
10 C. Muani - Arsi Engmawi