Alien an awm thei ngei ang!

Film aṭangin kan hre em em tawh a, UFO an ti, Crop Circle an ti, alien-te hi an awm ngei leh ngei lohah khawvel a inhnial nasa hle. Ṭhenkhat chuan hmanlai civilization te kha heng alien-te vang a ni e, tiin, khawvela hmun hmingthang leh ropui tak takte chu alien-ho kutchhuak anga an sawi laiin, science taka sawifiahna hmuh tur erawh a tam lem lo hle.

Khawvelin awih tur nge awih loh tur tia a inhnial laiin, University of Sheffield leh University of Buckingham Centre for Astrobiology-a researcher-te chuan thil an hmuchhuak thar a, chu an thil hmuhchhuah aṭang chuan alien-te hi an awm thei ngei ang, an ti.

Heng university pahniha scientist-te hian Ghost Particle an hmuhchhuah thu an sawi a, hei hian alien-te an awm ngei thei tih a tichiang niin an sawi. Living Baloon an tih mai an hmuchhuak tih an sawi a, he baloon chhungah hian alien organism, te tak te te, mita hmuh tham loh a awm a, hei hi alien-te an awm ngei a ni tih nemnghehna tharlam ber niin an sawi.

Milton Wainwright, University of Sheffield-a molecular biology leh biotechnology-a professor chuan Ghost Particle an tih mai hi baloon ang deuh, a chhunga nunna siam thei pai niin a sawi. He particle hi mi ṭhenkhat chuan khawvela awm, thli leh eng emawin boruaka a vawrh chhuah niin an ngai a, mahse Wainwright chuan, "Hetianga particle lian hi lei aṭanga km 27 zeta sanga vawrh chhuah hi a theih loh," a ti. Ghost Particle hi stratosphere-a an hmuh a ni.

Wainwright chuan, "Hetianga boruaka vawrh chho thei tur chu tlangkâng a ni a, chutiang chu tun kum thum chhung hian a awm si lo...khawvel pawn lam aṭanga lo lut ngei a ni. Kan thutlukna chu he leia nunna ngei pawh hi van thengreng aṭanga rawn lut a ni a, he khawvelah chauh nunna hi a inkhurkhung lo a, he hmun aṭanga rawn awm pawh a ni hek lo," a ti.