Grammy: Em leh Iggy Azalea inelna a ni ang em?

Category hrang hrang a awm a, chung zinga ngaihven hlawh chuan rap huang chhung hi a ni. Kumin Grammy Awards-ah hian rap music huang chhung bikah Eminem nge chungnung ang Iggy Azalea tih hi mi tam tak thlir a ni.

Rapper ve ve an ni a, mingo ve ve an ni. Eminem-a album Marshall Mathers LP 2 hi a hit hle a, chutiang bawkin Iggy Azalea album The New Classic pawh a duai lo. Heng album pahnih leh, an album-a hlate hi mite ngaihven a ni.

Eminem hi rap khawvelah chuan mi ropui a ni a, Rap album lawmman pawh ṭum nga lai a la tawh. Nominate a nih reng rengin a la la deuh ziah a, ṭum khat chiah a la la la lo. Chu chu kum 2005 khan a ni. Hemi kum hian Em-a album Encore kha nominate a ni a, mahse hemi ṭum hian Kanye West-a album Late Registration khan Rap Album a hawn ta thung a ni.

Azalea tan chuan engkim hi thil thar a nihna chin a la awm. Kumin hi Grammy-a a lan vawi khatna a ni a, a la a nih ngat chuan hmeichhe mala Rap Album la thei hmasa ber a ni dawn. Rap Album Award dawng tawh zingah hmeichhia chu an awm tawh ngei a, mahse a mala la chu an la awm lo. Kum 1996 khan Lauryn Hill chuan Rap Album a dawng tawh a, mahse mimal ni loin, Fugees hminga an dawn a ni.

Nominee-ah hi chuan an awm fo tawh. Missy Elliott te, Eve te, Nicki Minaj te pawh, mahse an la dawng em lo. Hengte hi thil awm dan a nih avangin Iggy Azalea-ah hian beisei a sang a, mi pawhin an ngaihven hle a, record a siam thei ang em, tih an inzawt mek.