Zaninah musical event ngaihhlut Concerto 3

Thla tina buatsaih ṭhin, Musical Concerto chu zanin hian Chanmari YMA Hall-ah, dar 7:30 aṭangin neih ṭan leh a ni dawn a, hetah hian Patea, Eric Renthlei leh Ela Fanai te an inlan ang.

Concerto hi ṭum hnih neih a ni tawh a, mipuiin an hlut a, musician te ngei pawhin an hlut hle. Music a ngaihnawm a, a hlawkthlak a ni. En man a awm dawn a, en man hi Rs. 300 tur a ni.

Zanin Concerto-ah hian Patea, Magdalene leh Atari Minor-a an drummer ni mek a inlan ang a, The Prophets leh Atari Minor-a an guitarist Eric Renthlei a lang bawk ang a, Lemon House-a an saxophonist, Ela Fanai chuan saxophone hmangin kalkhawmte music ṭha a hlui dawn a ni.

Magdalene kan hria a, Mizorama gospel band hlawhtling ṭhin kha an ni a, Atari Minor pawh kan hria a, kan band neih ṭhat zinga mi a ni. Heng band pahniha an drummer Patea hi drum-ah chuan a chhe lo tih kan hria a, tunah hian Grandton School of Music-ah instructor a ni mek bawk. Atari Minor hian kumin hian album tihchhuah an tum a, heta an element zehtel turte pawh zanin hian Patea aṭangin kan hre thei ang chu maw. Concerto-ah hian drum vuak puah chur chur ringawt kha a ninawm dawn avangin musician dang a rawn thawhchhuahpui dawn a, a thawhpui turte pawh an neu lo. Vocals-ah Zahminga, bassist-ah Jonah Hnamte, guitar-ah Bishal Gurung leh keyboardist-ah Mawia te a rawn hmang ang.

Nikuma gospel band intihsiaka pakhatna dawng, The Prophets-a an guitarist, he intihsiak ṭuma best guitarist-a thlan Eric Renthlei hi nikum Praise14-a an guitarist kha a ni a, mi tam tak chuan a guitar play mawi leh phui ṭha zet kha kan la hria ang. Dimebag Darrell, Neal Schon, John Petrucci, Slash, David Gilmour, Jimi Hendrix leh Jorn Lofstad te hi guitar lama amah influence-tute aṭang hian a guitar khawih pawh a neu thei lo. Metal, Blues, Funk, Progressive Metal leh Electro te a ngainat zawng a ni a, Concerto 3-ah hian heng style hrang hrang RnB Soul Funk, Rock Ballad leh Progressive Metal te a play ang.

Saxophone hrim hrim pawh mi tam tak chuan kan la hre lo ang, chutihlai chuan Ela Fanai hian kum 2007 aṭang daih tawh khan saxophone hi a lo play tawh ṭhin. Saxophone hi wind instrument a ni a, jazz music-ah te an hmang nasa hle a, music genre dangah pawh an hmang tho. Ela Fanai hian Saxophone heti khawp a lo thiam tur hian nitin darkat khat aia tam a practice tlangpui. Dreamhunter music video thar Dawn Tisei Turan tihah khan saxophone a play a, video-ah erawh a hmel a lang lo thung. Concerto-ah hian music style hrang hrang a play ang.