Call of Duty-ah FaZe an Ṭha ber

Kum bul kan ṭan a, eSports lamah event a awm chho leh ta malh malh a, a bul ṭanna lian tham, MLG Columbus Open an zo fel. He open hi Call of Duty: Advanced Warfare hmanga intihsiak a ni a, a pumpuiah FaZe an champion.

MLG Columbus Open-ah hian team 140 zet an tel a, inkhelh chhung pawh a rei hle. Prize hi $10,000 a ni a, mahse hei hi kumin chhunga competition lian zawk atana inbuatsaihna ṭha tak a nih avangin ngaihhlut a hlawh.

FaZe hian bul an ṭan chhia a, mahse a tawp­ah an arh daih. An team-a mi Patrick 'Aches' Price chuan a kut a tihnat avangin a khelh chhun­zawm thei lo a, an team hian an khel tluan thei lo mai ang a, an ti hman hial a, mahse an bei a, a tawpah chuan a ding chang ber an ni.

Bul ṭan phatah FaZe hian Prophecy chu 3-0 ngawtin an hneh lo nghal phawt a, mahse an player inhliam vang leh an chak loh avangin an hnual mai loa an bei zel a, team ṭha dang, Denial eSports, Team Kaliber te an hneh chho a, stage sang zawkah anmahni hnehtute ngei Prophecy an hneh leh bawk.

Final-ah OpTic Gaming-te nen an inhma­chhawn a, hetah pawh chakna an chang. Final hi Pathianni khan khelh a ni. A tira an hneh loh Prophecy chu pathumna an ni a, Team Kaliber hi palina niin, Denial eSports leh EnVyUS te pangana an ni.