George Clooney thlalak vangin Iran sorkarin chanchinbu a titawp dawn

Islam ramte hi chu an fir ṭhak ṭhak viau. Charlie Hebdo chanchinbua thawktute thah an nih chungchang kan hria a, khami thil thleng duh loh lantir nan khan Golden Globes-ah milar ṭhenkhatten Charlie Hebdo chanchinbu an thlawpna an lantir a ni. Heng zingah hian George Clooney pawh a tel a, a thlalak hi Iran rama chanchinbu pakhatin a tichhuak a, he chanchinbu hi Iran sorkar chuana titawp dawn.

Golden Globes sem zan khan George Clooney hian Charlie Hebdo a thlawp a ni tih lantir nan 'Je suis Charlie' (Charlie Ka Ni) tih inziakna button a inbel chhuak a, he button a inbelna thlalak hi Iran rama chanchinbu, reformist-ho tihchhuah, Mardom-e Emrooz chuan a tichhuak a, Iran sorkar pawi a sawi. Iran sorkar chuan he chanchinbu, Mardom-e Emrooz hi chawlhkar thum chauh chhuah phalna a pe a, a bak chu an chanchinbu an tichhuak thei tawh dawn lo a nih hmel.

Mardom-e Emrooz chanchinbu hian politics leh khawtlang lam thila Iran president, Hassan Rouhani policy a thlawp dawn tih intiamna a tihchhuah leh avangin chalwhkar thum chhung chu a chhuahzui an phalsak a ni.

French chanchinbu, lar lutuk lo, Charlie Hebdo weekly hian Zawlnei Mohammed-a cartoon-a an siam a tihchhuah avangin January 7 khan Muslim firfiakten an bei a, mi 12 lai an kaphlum a ni. Hemi hnua an chanchinbu an tihchhuah lehah Mohammed-a thlalak hi an dah leh a, a hmaa copy sing tam vak lo hralh ṭhin khan maktaduai chuang an hralh thei tawh a ni.