Beisei angin Meghan Trainor

A album a tihchhuah hlim, kar liam ta khan Meghan Trainor album thar hi critics te chuan Billboard-a pakhatna a hauh theih ngei an beisei a, an beisei ang thil thleng. Taylor Swift chu a rawn hnawt chhuak a, Trainor album, a tihchhuah thar leh, Title chuan pakhatna a rawn hauh.

Meghan Trainor hian album pangngai copy 195,000 lai a hralh a, hei bakah internet streaming leh tracks download, equivalent album an tihte nen copy 238,000 zet a hralh a ni. Chhinchhiahna tur a awm nghal. Trainor hi tun kum nga chhunga hmeichhe zaithiam, full length album vawi khatna tichhuak zinga hralh hnem ber a ni. A hmaa record lo siamtu chu Scottish hmeichhe zaithiam, Susan Boyle kha a ni a, kum 2009 November thlaa I Dreamed a Dream album a tichhuah kha a album hmasa ber a ni a, kar khat chhungin copy 701,000 lai a hralh thei.

Taylor Swift album hralh hi a tlahniam hlei thei lo a, hralh a kal em em reng. Tunkar chhung khan copy 131,000 zet a hralh leh a, kar hmasa ai chuan a hralh tlem viau tawh a, kar hmasa aia a hralh tlemna hi 15% lai a ni. Heti hian swift hian a album 1989 hi copy maktaduai 4 a hralh tling ta.

Kidz Bop Kids 27 chu pathumnaah a rawn chuangkai bawk. He album hi zaithiam hrang hrangte zai dahkhawmna a ni a, tunkar chhung khan copy 80,000 lai an hralh. Heng zinga copy 77,000 chu album pangngaia hralh a ni a, a bak chu equivalent album a ni.

Billboard Hot 200

"Title" - Meghan Trainor (238,000)

"1989" - Taylor Swift (131,000)

"Kidz Bop Kids 27" - Various Artists (80,000)

"X" - Ed Sheeran (77,000)

"Uptown Special" - Mark Ronson (77,000)

"The Pinkprint" - Nicki Minaj (54,000)

"In the Lonely Hour" - Sam Smith (50,000)

"V" - Maroon 5 (48,000)

"Hozier" - Hozier (42,000)

"2014 Forest Hills Drive" - J. Cole (38,000)