Fashion Fiesta

Thawmhnaw hak tur kan hria, a mil tur pheikhawk kan bun, kan dik ta thlap mai; hmai hnawih nen, i kawrlum ngainat tak emaw, coat a chunga hak pahin in i chhuahsan dawn ta, darthlalang hmaah a tawp nan i han inennawn leh zuai. I thlek kual, i duhthusam hle, amaherawhchu kim lo a awm tlat. Chiang lehzual zawkin i han inen leh a, i thawmhnaw, bengbeh eng i lo a kim vek nain a tel lo chuan i incheina a kim lo tih i hriat chian, i bag, i mamawh i kenkhawmna ṭhin chu i han ah meuh chuan, i kim ta. Kan nitin nuna a hmei apaina kan incheina tichangtlungtu ber pakhat kan ah chhuah ve ziah hi, a pawimawhin kan lan dan zawng zawng tidanglam vek thei a nihzia alang tlat. Hnathawk ṭhin emaw, school, college kal lai naupang chenin, kut ruaka kal ta nawl nawl hi kan vang ṭhin khawp mai. A pawimawh viau e ti lo chuan a tam zawk hi chuan kan hmuh hmuh kan ak chhuak ve chawt mai niin a lang. Kan inchei dan zawng zawng tidanglam vek thei tih hre reng chungin kan hriat tlanglawn tak, hriatchian loh tak si hi belchiang dawn teh ang. Kan ah chhuah hun hi chi hnihin ṭhen dawn ta ila, chhun leh zan emaw, chhuahvah pangngai leh thil tihpui nikhua angah te, chhuahvah, class kal, office leh len khawthawn huna kan ah ṭhin ho, kan tana ṭangkai tur te, kan kalna tur leh a hmun leh a hun zirin ilo enchhin dawn teh ang.

Sling Bag/Shoulder Bag: Heng bag hi chu kan ṭhalai te ngainat leh hmelhriat tak mai a ni a, dar leh lama bah paha ah mai chi niin, a aktu tan chetvel a tiawlsam phian a, a tunlaiin ṭhalai lamah a tla na.

Tote: Beach bag tia sawi a ni fo; a lian ṭhain a ṭangkai, i shawl bah tur, i mamawh incheina leh lehkhabu lian deuh te a leng tam a, bazaar nikhuaa zipper hawn ruk ruk ngai lo a, inhawng sa a nihna hian ah a tiawlsam a, chubakah a leng hnem a, a ṭha phian.

Hobo: Heng bag ang chi ho hi chu en tawpa zawi hmel deuh hnuang, amah pawha ding zo lo, nalh phian si, kan milarte ngainat tak, hmanlai design tunlaia an chin/uar thar leh a ni ber.

Satchel: A mimal tak pawha kan ngainat, a chunga inhawnna awm leh a khaina awm, a chhung zau ang reng tak, lian hluai si lo a, ṭangkai tak a ni, dara bah emaw kutlawnga ken mai pawh a awlsam phian.

Bucket Bag: Bucket ang tak tung deuh ut, a mawng lam bial, leng hnem thei tak, class kal vela ṭangkai tak tur a ni.

Duffel: Infiam mite leh zin veivahna atana ken atana ṭangkai leh ṭha tak, suitcase te anga khauh ṭeng ṭung a nih ve loh avangin ram chhung, Sumo chuan leh Bus-a suitcase lian ken ulh ai chuan a lenghnemin, a awlsam phian ang.

Backpack: Tunlaia lar chho tak a bikin ṭhalai, a hmei apaina kan lawm, thil han ah awlsam si, two wheeler khalhho tan phei chuan ṭangkai tak a ni. Heng bakah hian puipun leh ni pawimawh bik atan ah chhuah a awlsam.

Clutch: Hre lo kan awm ka ring lo, ṭhalai zingah lian lutuk lo, mamawh zual chauh lenna tura duan, i phone leh make up mamawh zual bik lenna tura siam, design hrang hrang a par aṭanga lemziak awm, leather emaw, chei khah vek pawh a ni thei. I kawr mil thlan thiam a ngai khawp ang le.

Evelope Bag: Evelope ang taka siam, phek hlai lam, mamawh zual kenna tura siam tho, party, inneih leh thil lawm, chaw ei khawm ni khuaah a ṭangkai.

Wristlets: Purse aia lian si, chhuahvaha ken atana siam, mahse clutch te anga te fel at, a kengtu tana thlauh palh leh ken awlsamna tura banbun ang deuha a khaina awmho sawina.

Minaudiere: Clutch chi khat, stones leh thil hlu leh ziarang dangdai tak taka cheibawl, en mai pawha nalh leh changkang, man to tih hriat, lipstick leh phone emaw te chauh lenna angho hi kan thawmhnaw hak a simple phei chuan ken emaw khai ngei a ṭha, mi a ti chei zual.

Heng bag hrang hrang te hi a hun leh a hmuna ah an nih chuan an ṭangkai hle a, a nih loh thung chuan kan tan hnawksak tak an ni. Kan kalna tur hmun mila thlan a ṭha, kan thuamhnaw nen inmil bawk se, a rawng a inang tur tihna lam a ni lo, kekawr tlawn jeans te nen clutch lo ken daih ang chi te kha sim a ṭha. Min tiincheitu, mawitu anih mai piah lamah min tilang ṭhing vektu a ni tih hriain, heng bag ka rawn tarlan te hi a hun leh hmunah i lo ak ṭhin dawn nia.

tluangpuii hmar
instructress
vakiria institute of fashion technology