Hollywood-a Kristian ṭhate

Hollywood khawvel leh ringtu nun hi kalkawp hlei theiah mi tam tak chuan an ngai lo a, Hollywood chu nawmchenna khawvel entirna ni anga an ngaih laiin Hollywood-ah hian Kristian ṭha tak an awm a ni tih hi khawvelin a hre lo fo ṭhin. Khawvel nawmna thlahleltute awm khawmna ringawt a ni bik lo a, ringtu ṭha tak takten an awm chilh a, chuvang chuan Hollywood aṭang hian Kristian movie ṭha leh hlawhtling tak tak a rawn chhuak ṭhin.

Hollywood milar zinga A-list an tih zingah ngawt pawh hian Kristian ṭha tak tak an awm a, a ṭhen chuan evangelical Kristian tiin an inchhal kher ṭhin. Chung zingah chuan Denzel Washington hi huhang ngah berte zinga mi a ni. He actor hi a hlawhtling a, a class pawh a sang. Vawi khat movie chana $mtd20 zel hlawh thei tur zinga mi a ni. A pa hi pastor a ni a, kohhran tan pawisa pawh a thawh nasa. West Angeles Church of God in Christ Kohhranah a lawi a, a kohhran lawinaah hian $mtd2.5 zet a thawh.

Transformers thar bera thiam taka chang, actor lar berte zinga mi Mark Wahlberg hi Kristian ṭha tak a ni tih hi kan hre viau tawh mai thei. Khawvel khawi hmunah pawh kal se, inkhawm hunah chuan a awmna aṭanga biak in hnai berah a inkhawm ngei ngei ṭhin. Tunhmain a lo dai pelh ve tawh ṭhin a, tunah erawh chuan ringtu nghet tak a ni. Los Angeles-a Catholic kohhranah a lawi.

Zu avangin harsatna a tawk ve fo ṭhin a, mahse hemi avang hian Mel Gibson hian a rinna a bansan tihna a ni lo e, a dai pelh ve ṭhin a ni. Kristian ṭha a ni a, a film siam reng rengah pawh hetiang lam hi a telh nasa. Passion of the Christ kha ama buaipui a ni a, Apocalypto pawh kha Central America-a Red Indian nun bawraw tak aṭanga Kristian missionary ten nunna thar an thlen dan chanchin a ni.

One man army lar laia khawvelin actor a ngaihsan, Bruce Lee-a film-ah pawha chang, Chuck Norris pawh hi Kristian ṭha tak a ni a, kawtthlera vakrawlaite zinga Chanchin Ṭha hrilin a buai ṭhin. Kristin Chenoweth pawh hi chuti tho; "Isua ang nih hi ka duh leh tum ber a ni," titu a ni. Rocker huaisar nia an ngaih, inchei reng leh stage lamah rapthlak tak taka che fo ṭhin, Alice Cooper hi mi tam tak rin loh deuhin Kristian ṭha tak a ni.