Miss Universe 2015

Paulina Vega

Latin nula hi an chhe lo thei hle a ni ang, miss thlanah hian khawvela a ber an ni fo mai. Kumin Miss Universe-ah pawh Columbian nula, kum 22 mi Paulina Vega chu Miss-a thlan a ni.
Miss-a thlan chhuah tam tak hi chu a hmain miss thlanna dang eng engah emaw an tel tawh ṭhin a, Paulina Vega erawh chu a vawi khat telnaah an ram ai a awh a, Miss Universe-a thlan nghal a ni. Miss Universe-a thlan a nih hnu hian Vega hian beauty pegeant lam chu a bansan ang a, a zirna lam a chhunzawm lehnghal ang tih a sawi. Tunah hian Colombia-a Barranquilla-ah business administration a zir mek. A pa hi Colombia-ah hian tenor part satu lar (opera-ah) a ni.
Miss Universe contest-ah hian ram hrang hrang 88 aṭangin an nula neih ṭhat ber ber an rawn thawh a, Columbia chuan Miss title an hawn ta a ni. Miss USA, Las Vegas nula, Miss USA-a thlan a nih hlima Nevada state ai a awh thei lo ang, California-ah a awm tam zawk tia an sawi, Nia Sanchez chu First Runner-up a ni a, Miss Ukriane, Diana Harkusha chu Second Runner-up a ni. Top 5-ah hian heng miteho bakah hian Jamaica leh Netherlands te an lang.
National costume-in Miss Unverse thlan hi bul ṭan a ni a, Miss Canada inthuamna chuan photographer-te mit a la hle. Ice hockey stick hmanga cheimawi a rawn inbel chhuak a ni. A pumpuiah Miss Indonesia chu costume ṭha bera thlan a ni a, top 5-ah hian Argentina, Canada, Germanu, India leh Indonesia te an awm. Top 5 thlan a nih hnuah social media hmangin fan-ten an vote a ni. Puerto Rico aiawh chu Miss Photogenic-a thlan a ni.
Miss Universe judge-te hi hna hrang hranga mi thiam an ni. A ṭhen chu fashion guru an ni a, a ṭhen chu actor, a ṭhen musician, midang chu football player, baseball player, boxer ropui Manny Pacquiao te pawh judge-ah hian an tel.
Miss Universe thlanah hian mipui lamin an duh ber nia lang chu Venezuela nula, Migbelis Lynette Castellanos kha a ni. Venezuela nulate hi an chhe lo a, khawvelin an duh a ni. Miss Universe thlan hnuhnung paruka title pathum kha Venezuela nulatena an lak a ni.
Nia Sanchez, Miss USA hi Tae Kwon Do black belt ngat a ni a, mipa tam tak tan chuan zuam ngawt chi a ni lo. Hmeichhe inhumhim nan a ṭangkai tih a sawi fo a, hmun hrang hrangah a zirtir ṭhin bawk.
Miss World thlan khan, Miss Honduras aiawh tur chu a laizawn bialpain a that a, kha vang khan Miss Honduras-in hriat a hlawh phah hle. Miss Universe-ah pawh hian Honduras aiawhin hriat a hlawh leh hle. Honduras aiawh hi Gabriel Ordonez a ni a, a nalh pawh a nalh. Hriat a hlawhna ber chu Miss Universe-ah a inlan dawn tih a hriat aṭangin nasa lehzualin a ṭang a, kum khat chhungin a rihna pound 40 (kg 20 deuh thaw) a hloh hman.
Philippines ram aiawh, Mary Jean Lastimosa hi a chhuanawm hle. A tleirawl laiin asthma natna a nei ṭhin a, a inenkawl nasa ṭhin. He natna hi sports hrang hrang khelin a hneh lêt a, nasa taka inkhelh lama a kal avangin asthma natna aṭangin a dam phah a ni.
Miss Universe hlui, Olivia Culpo chuan tun aṭang chuan khaw dang a hawi tawh dawn tih a sawi a, nakkin hun zel tur ruahman a ngai niin a sawi. A sawi awmzia chu Nick Jonas nen an innei thuai dawn tihna a ni thei. Nick Jonas nen hian an inrim urhsun thei hle.
Miss Universe hi US-a Florida state-a Florida International University-ah thlan a ni. Contestant-te an thlentirna hi Miami khawpui daifem, Doral-ah a ni a, Doral hmunah hian Venezuela aṭanga pem lut an tam a niang, a hming lemah Doralzuela an ti.