Obama car nge Modi-a car ṭha zawk?
American President zinga US sawrkar motor-a chuang hmasa ber chu President 26-na Theodore Roosevelt a ni a, kum 1907 khan a ni.
Roosevelt-a car hman hmasak ber hi White Stanley Steamer a ni a, kan hriatthiam dan tur chuan film hmanlai deuha an motor, a ke bial lian tak, a chung nei lo steam engine hmanga tih kal a ni.
Kum za chuang fe a ral hnu chuan steam engine-a tih kal motor, terrorist ten duh tawka an beih theih tur motor chu President meuhin a hmang tawh bik lo.
India President car a him lo em ni!
India-in Republic Day vawi 66-naah a vawikhat nana US President kan mikhual meuh phei chuan car naran chu President chuan an hmang lo chiang hle. Nimina Rajpath-a President motor chuanna hi bullet leh bomb proof a ni hrim hrim tia i ngaihruat chuan i tisual hauh lo ang. Chu mai erawh US President tleng vel nan an duhkhawp lo hle, duhthuthala siam leh thuam a ni a, a sakhmingah US Secret Service te duh dan angin 'The Beast' an vuah hial.
Official-a Obama Rajpath kawnga a lo kal lai hi chuan India President car-a chuang mai tura tih ni mah se, niminah 'The Beast' aṭangin US President hi a rawn pen chhuak si. Mukherjee-a motor hi a him tawk lo em ni tih zawhna a awm thei ang.
India President motor hi Mercedes-Benz s600, silai leh grenade te laka him chu ni mah se terrorist-te hmanraw hrang hrang laka him zo tur chuan 'The Beast' a la phak loh avangin Obama hian a hlau deuh a nih hmel. Ṭum dangah chuan hetiang hunah chuan India President motor ngeiin Chief Guest te an kal ṭhin.
'The Beast' aiin Modi-a car a ṭha zawk an ti!
Nimin Republic Day vawi 66-na lawmnaa Rajpath-a motor kal hi 'The Beast' chauh a ni lo tih chu kan hria ang. Mahindra company siam Scorpio-ah Narendra Modi hi a hma chuan a chuang ṭhin. Prime Minister a nih hnu chuan, kum 2003 aṭanga Prime Minister apiangin an hman version hrang hrang siamchhuah tawh BMW 7-Series 760Li Security Edition-ah ngat Modi-a pawh a tleng ve ta zal zal mai. Modi-a car hian hriamhrei hrang hrang hmanga beih a dawl zo hle a, Silai hrang hrang leh terroist-te hman tlanglawn AK-47 a kah a dawl zo lehzual.
Obama-a 'The Beast' leh Modi-a BMW khaikhinna hi thlir zel rawh le. Mihring vawnghim tura car siam ve ve a ni, mahse mihring ṭheuh ṭheuh ze hrang nei kan nih ang tho hian car pahnih te pawh hian nihphung danglam ve ve an nei. A hmasain Obama-a car hi hrechiang phawt ila.
* Titanium, ceramic, steel leh aluminium fuankhawm hmang a siamchhuah 'The Beast' kawngkhar te hi inches riat a chhah, thilin a sut tlang mai mai theih loh tur thira thuam a ni. A kawngkhar rihzawng hi Boeing thlawhtheihna 757 jet cabin kawngkhar nen a inang.
* A ke tyre hi thler leh puncture thei loa siam a ni, a rim hi thir hlang, a tyre tello pawha hmun hla tak chak tak a tlan thei a ni.
* Kangmei lakah kang ṭhelh motor koh ngai loin amah leh amah a inṭhelh fihlim thei a, zanthimah khawhmuh harsatna a awm loh bakah tear gas a kapchhuak thei bawk.
* Obama thisen mil awmna, blood bank chu car-ah hian dah a ni.
* Car chhungah hian khawi aṭang pawha White House leh Pentagon biak theihna art satellite phone a awm.
* 'The Beast' hian infrared smoke grenade a kapchhuak thei. Misual beih tawh thutah a ṭangkai a, smoke grenade hmangin a awmna hriat loh turin khu a chhuah thei a. Infrared hi chuan khu nasa tak karah pawh a hmelma te hmu thei turin a pui thei.
'The Beast' hi
Engine: 8,000 cc (approx)
Power: 800 bhp
Fuel: Diesel
Mileage: 3.4 kmpl
0-100 kmph: 15 seconds
Top Speed: 150 kmph
Price: Rs 8 crore
Narendra Modi-a car ve thung aw
* Gas hlauhawm hmang a beih tawh lakah car chhung hi a him a, oxygen tank hranpa a nei.
* Petrol hmang a ni a, Petrol tank hi a bik taka siam niin eng chhiatna pawh tawk se a puak ve thei lo.
* Car hnuai hi thir ṭha mia thuam a ni a, bomb rah puah lakah te a vawnghim ang.
* A ke thep ta se kilometre tam tak pawh buai loin a tlan zel thei.
* Obama car nen a inanna chu kangmei lakah a inṭhelh fihlim ve thei, emergency atan chhuahna bik a awm, bullet-proof a ni ve tho.
* Modi-a car ṭhat zawkna chu a zâng zawk a. A bikin hmun tawi te kal zung zung leh chetkualpui a awlsam bik.
BMW 7-Series 760Li
Security edition hi
Engine: 5,972 cc
Power: 544 bhp
Fuel: Petrol
Mileage: 4.5-7.46 kmpl
0-100 kmph: 6.1 seconds
Top Speed: 210 kmph
Price: Rs 5 crore