DJ-in hma a hruai ta e
Ṭhazual chart-ah DJ Lalvenhimi a chungnung leh ta ber mai. DJ-i hla, 'Khua tuah loh di' chu pahnihna aṭangin pakhatnaah a rawn kai chho a, a hmaa pakhatna, Essy chu pahnihnaah a tla thla ta thung.
DJ-i hi lengzem huang chhungah chuan a hlawhtling berte zinga mi a ni. A music video pali lai mai chu Ṭhazual chart-ah hian pakhatna a hauh thei. Nikum khan Michael M Sailo nena an sak dun, Liam Mai Rawh chu pakhatnaah hun rei tak a awm a, nikum hmasa, kum 2013 chhung phei kha chuan DJ-i hi Ṭhazual chart-ah a chungnung lawr lak a, a hla, Inṭhen Lo'ng tih kha Ṭhazual chart-ah pakhatna vawi 11 ngawt a hauh thei a, a hnua a hla tihchhuah leh, Ka Chan Hi tih khan ṭum 12 pakhatna a hauh bawk. DJ-i hian music video panga a tichhuak tawh a, chung zinga palite chuan Ṭhazualah hian pakhatna an hauh thei.
'Khua tuah loh di' hi Zoremi Collection album-a mi kha a ni a, DJ Lalvenhimi hian a rawn tuaihnum leh deuh a, a rawn hlawhtlinpui hle. November thla tira a tihchhuah chauh kha a ni a, thla hnih hnuah pakhatna a rawn hauh thei a ni.
Tuna DJ-i hla hi December 1 aṭang khan Ṭhazualah hian a rawn lang ṭan a, hemi ṭum hian pariatnaah bul a ṭan. December 15 khan pasarihnaah hma a rawn sawn chho hret a, Decmber 29 kha chuan pahnihnaah a rawn awm thei tawh a ni. January 12 khan pahnihnaah bawk a awm a, pahnihnaah ṭum hnih a awm hnuah pakhatnaah a rawn chuang kai ta a ni.
Nikum khan hla pakhat dang chu record a peih fel vek tawh a, engtikah nge a tihchhuah ang a la hriat loh. DJ-i hla neih sa hi Michael M. Sailo nena an sak dun a ni a, a music kalhmang erawh Liam Mai Rawh nen khan a inang dawn lo a, hip-hop lam rawng a kai tawh lo ang.
Top 10 aṭangin Josephine leh Sangkimi Khiangte te an chhuak a, Christy hla thar 'Chhingkhual Di' a rawn lang thar a, Samuela Chhangte hla 'Rinawmin' tih a rawn lang thar bawk.
1 DJ Lalvenhimi - Khua tuah loh di
2 Essy - In chhuang mai lo la
3 Thangromawia - Phuloh lung di
4 Kolkata Mizo Student - Kan ding ( Zoram tan)
5 Christy & Hriatrenga - Muanna nge hmangaihna
6 H. Vanlalngura - Ka rawn zawng zel
7 Samuela Chhante - Rinawmin
8 Ropuii Pachuau - Matehawngi
9 Christy - Chhingkhual D
10 Biakmuana - Min hlan lai khan