Khiangte Construction Ṭhazual Lengzem : The Radio 'Ṭha chungchuangi' a ṭha ber

Khiangte Construction Ṭhazual Lengzem chart tharah band ṭhangduang tak, The Radio 'Ṭha chungchuangi' tluk zo an awm lo a, a ṭha ber.

'Ṭha chungchuangi' hi Phillip Lalremruata phuah a ni a, recording hi C.Hruai (3 Brothers' Recoring Studio) kut chhuak niin, video hi Ṭhate Ralte siam a ni. He hla hi June 5 khan MDM channel-ah chhawp chhuah a ni a, a ngaihnawm leh hle.

The Radio band member-te hi Philip Lalremruata (vocalist + guitarist), Angel Lalparmawii (vocalist), K. Malsawmkima (bassist), Emanuel Lalkawltira (drummer) leh Samuel Zothanpuia (lead guitarist) te an ni. Member-te hi Ephraim Higher Secondary School-a in classmate vek leh inkawm ho ṭhin niin, function neihnaah inpawtkhawmin an perform a, hemi hnu hian ti ho zelin kum 2022, December 20 khan band angin an ding zui ta a ni. Tunah hian music video pathum an siam tawh a, tleirawl leh rual u lam deuhte pawhin an ngaihnat zawng taka zai thiam niin, ngaihthlak nuam leh mawi dangdai tak vek an ni. An hla hmasate pawh an hit hle a, million view te pawh an nei thei a ni. An project hmabakah hian Tintin Entertaiment movie thar tur, A.L.I.C.E ( A blue bird) OST an sa dawn a, hei hi an buaipui mek a ni.

Mic Khan 'Ka neihchhun' chu chart hmasa pathumna aṭangin pahnihnaah a rawn chhohpui bawk. He hla hi ama phuah niin, beat and recording hi Smiley kutchhuak a ni thung. Pathumnaah chart-a mikhual lo tak, Asang Project ft Ruth Tochhawng-te chuan 'Min en teh' tih an lanpui bawk. Mizo Idol intihsiakna aṭanga invawrh chhuak, David Darlong 'I tling tawk' tih chu No 4-ah awmin, tunlaia boruak nei lian tak, Zothana 'Aw Chhawrthlapui' chu Top 5-ah a lang bawk.

Top 10-ah hian Smiley, Drac Frost te kan la hmu chhunzawm bawk a, anni bakah lang thar pathum - Manuna, Mendal x Smiley leh MDM Lunglei various artists an rawn lang bawk a ni.