Mad Max: Furiosa Charlize Theron aiah Taylor-Joy

Director leh writer lar, Oscar hial pawh lo dawng tawhtu, Mad Max vanga hriat hlawh zual George Miller chuan Mad Max: Fury Road prequel Furiosa-a chang tur zingah Anya Taylor-Joy, Chris Hemsworth leh Yahya Abdul-Mateen II-te hming a sawi ri.

Mad Max: Fury Road hi kum 2015-a tihchhuah kha niin Furiosa lemah hian kha film-ah khan Charlize Theron chu a chang tawh a,  Taylor-Joy chuan tunah chuan Theron-in a lem a chan Furiosa la naupan lai deuh lem a chang dawn ta niin a lang.

May thlaa The New York Times-in an interview-naah khan Miller chuan kum 20 bawr vel lemchan thiam hmeichhia Furiosa lema chang tur a zawn thu a lo sawi tawh a, tunah chuan a duh a hmu ta a ni ngei ang. Khatih hunlai kha chuan de-aging technology hman a, kum 44 laia upa tawh Theron chu chan tir leh mai a duh deuh hman tih sawiin tunah erawh a duh ang mi ngei, kum 24 mi lek Taylor-Joy chu a hmu ta a nih hmel.

Furiosa film hi Miller-a kutah a innghat thui dawn hle a, script a ziahpui dawn bakah a produce dawn a, producing lama a lo thawhpui fo tawh Dough Mitchell nen an thawkdun dawn a ni. 

Deadline hnenah Miller hian Fury Road tihchhuah a nih hnu lawk khan Furiosa-i'n backstory ṭha tak a neih thu a lo sawi tawh a, chu chu kan hmu dawn ta a nih hmel. Mad Max tih hi chuan kum upa lam deuhte beng pawh a verh hlein a rinawm a, tunah chuan Mad Max khawvel maksak tak chu zauhin a awm dawn ta tih a chiang a, Chris Hemsworth leh Yahya Abdul-Mateen II-te hian tu lem nge an chan dawn tih erawh tarlan a la ni lo. 

Furiosa pual bik film-ah hian Max Rockatansky nen an la intawng dawn lo niin a lang.