Jaui 'I hlutna' music video a chhuak ta

Jaui hla 'I hlutna' lyrics video kha YouTube lamah i lo thlirin i lo ngaithla ve tawh em? Nalh titu an tamin a sa thiam bawk a, mi tam takin Music Video-a siam turin an ngen a, an ngenna chu tihhlawhtlin sakin music video-a siam tawh a, Inrinni zan khan Zonet lamah chuan an pe chhuak tawh a, YouTube lamah pawh a awm thuai dawn a ni.

'I hlutna' lyrics video hi August thla tir lam­ah khan Jaui hian a YouTube channel lam­ah a dah chhuak tawh a, ngaithlatute'n an hlutin thla hnih chhung vel lekin mi nuai hnih chuangin an thlir tawh a, tunah music video a siam ta a, thlir a hlawh leh hle turah ngai ang.

"Ka hmangaih chhan che chu I pian a nalh vang, i hausak vang tih ai chuan, i rilru ṭhatna avang hian ka tuiral lo chauh titu tawng ngei ang che u," tiin lyric video-ah khan ngaithlatute duhsakna a lo hlan tawh a, hei hian a hla kalhmang pawh a hrilhfiah chiang viau bawk.

He hla hi Jaui'n a thawh­pui reng 'Hope Music' kut chhuak a ni a, music, recording leh hla thu zawng zawng hi an kut chhuak vek a ni a, Jaui hla ṭhenkhat pawh kha anni kut chhuak tho hi a ni.