Angelina-in raltlante a tlawh

Raltlante ngaihven zual turin a duh

UN High Commissioner for Refugees a nih angin actress Angelina Jolie chuan Pathianni khan Iraq hmar lama raltlante dahkhawmna hmun a tlawh.
Heng raltlante hi ISIS tena an awmna leh chenna hmun an beih avanga tlanchhiate an ni a, Iraq hmar lam, Dohuk hmuna mi niin, Kurdish hnamte an ni ber. Raltlante dinhmun, an awmna hmun leh ei leh bar kawnga an khawsak dante a hmunah hian a enfiah a ni.
Jolie hian khawvel ram hrang hrang hruaitute hnenah raltlante ṭanpui tura chak lehzuala hma la turin a hrilh. "Suria ram buaina leh firfiaka chetna darh zau zel avangin pawisawilo mi tam takin an tuar a, khawvel ram hruaitute hian hma tun aia chak zawka an lak a ngai a ni," a ti. "Kan ngaihhlut zawng mahni in lama venhim ringawt a tawk lo a, helai hmuna awmte pawh hian kan humhimna an mamawh a ni...helai hmun hmang hian fiahin kan awm a, kawng hrang hrangah kan hlawhchham a ni," a ti.
"ISIL ten an rukbosak naupang nu ka hmu a, ka kawm a ni. Nu ka nihnaah hetiang tluka thil rapthlak hi chu a tam lo khawp ang. An fate chungah eng nge thleng ang tih ngaihtuahna ringawt an bawhbuai a ni..." a ti bawk.