Rachel Lalnunkimi hla thar 'Di Ṭhen Lunglen'

Mizo Idol star Rachel Lalnunkimi chuan Inrinni zan khan music video thar 'Di Ṭhen Lunglen' a tichhuak a, Zonet Cable TV lamah chuan en theihin a awm tawh.

Inrinni zan lama TV-a lo en tawhte chuan Rachel-i hla thar mawi zia leh music video hmuhnawm zia an hmu tawhin a rinawm a, kha video kha Escape Engmoia direct niin, ani hian Feli Fanai music video thar ber pawh kha a lo direct tawh bawk a ni.

'Di Ṭhen Lunglen'  hi  C Ṭhanṭhuama phuah a ni a, music chu EME Records kut chhuak a ni a, video chu BS Picture kut chhuak a ni thung. Music video-a make up hi Kymz_Ralte kut chhuak a ni bawk.

Rachel-i music video thar hi TV lama thlir hman lo tan Inrinni lo awm turah hi chuan YouTube lamah a thlir theih dawn a,  video teaser erawh YouTube lamah a dah tawh thung.

'Di Ṭhen Lunglen' hla hi a hla thupui aṭang hian eng lam hawi hla nge a nih a chiang nghal hle a, Rachel-i hian a sa lungrun thiamin lungkuai takin a sa thiam hle a, music video hmuhnawm tak en tur a awm bawk nen, mit leh beng a titlai hle.