Pensy-in a album a tlangzarh dawn

Ngaithlatuten thlaraua hlawkna an neih a duhsak ber

Mizo gospel singer hlawh­tling leh lar Pensy B. Lal­thangliani chuan naktuk hian a album thar, 'Nitin hmangaih che ka duh - Min tir ta che' album a tlangzarh dawn. Album tlangzarh inkhawm hi Serkawna Sap upa leh Pu Buanga Hall-ah neih a ni ang a, chawhnu dar aṭangin hun hman ṭan a ni ang.
Pensy-i album tihchhuah turah hian zai leh music video mai bakah documentary leh he video an siam dante dah lan a ni ang. Documentary-ah hian a hla sakte engtia sa nge, eng vanga sa nge a nih tihte tarlan a ni dawn a ni. Hla 13 a awm dawn a, heng zinga hla pahnih chu ama phuah a ni a, hla panga chu Kristian Hla Bua mi a ni ang. 'Nitin hmangaih che ka duh' tih, a album hming put chhan pakhat hi C. Lalzarmawia phuah a ni a, Ṭhazual Fakna chart-ah pawh pakhatna a lo hauh tawh ṭhin.
Tuan mi hi a album pa­thum­na tur a ni a, kum 2009 hnua a album thar ber tur a ni; a chhang a khât hle. Kum 2009 khan English album a tichhuak a ni. He album-ah hian Andrew-a nen an zai dun dawn a, an hla sak tur hi an pahniha phuah a ni nghe nghe.
"He album-a hla ka dahte hi ka hla duh em em leh keimah min hnehtu tak tak vek an ni a, Kristian Hla Bua mite pawh hi KHB-a ka hla duh ber berte an ni. A bikin Nitin Hmangaih Che Ka duh tih leh Min Tir Ta Che tih hlate hi ka testimony hla an ni a, ka duh lehzual hle a, ka nunah thu tam tak an sawi a ni," a ti.
'Min tir ta che' hla hi missionary-a a kal dawn laia Pathianin a pek a ni. Pensy-i hi kum 2011 khan Cambodia-a Phnom Penh-ah missionary, kum 2012 thleng khan a thawk a ni. Rawngbawlna chungchangah, "Missionary-in ka kal chhuak a, tualchhung rawngbawlnaah theihtawp ka chhuah vein ka inhria. Pathian hian khawi hmunah ber nge min duh a, khawiah nge min dah a tum tih hi hriat ka duh a ni. Khawi hmunah nge min hman ṭangkai a duh tih hriatna a rawngbawlna kawng hrang hrangah ka theih ang tawk tawkin ka inpe ve a ni," a ti. "A pawimawh nia ka hriat chu Pathian tana kan theihna leh thiamna zawng zawng pek a, kan pumpuia ama rawngbawl a, a tana inpek hi a ni," a ti.
"A music a ṭha dawn a, kei pawhin ka chhuang khawp mai. Ṭhalai duh chi a awm ang a, upa lam duh chi a awm ang a, mi nawlpui duh chi a awm ang," a ti. 'Nitin hmangaih che ka duh - Min tir ta che' album-a music hi BZA, Blue Waves, C. Lalzarmawia leh, Victor-a, Scavenger te kutchhuak a ni a, belhchian a dawl khawp ang.
Pensy-i chuan, "Ka music ngaithlatute, ka hla ngaithlatuten thlarau lamah hlawkna chhar ngei se ka duh a, ka album hmang hian Pathian hnenah thuk lehzualin inpe se ka duh ber. He album hi ka Chanchin Ṭha hrilna a ni a, chutiang rilru pu chuan lo ngaithla se ka duh a ni," a ti. Piracy a hluar a, zaithiam tam takin album an tichhuak ngam tawh lo. Hetiang hi a nih avangin Pensy-i pawh a fimkhur a, mipuite chu a album, pirate-sak lo turin a ngen a, a zuartute hnenah lei ngei se, a duh a ni.