Social media-ah Obama an sawiselna

Republic Day-ah khuallian atan an sawm ve em em a, TV-a lan lai pawhin chewing gum ṭhial a ṭhulh chuang lo. Barack Obama chu social media hrang hrangah an sawisel nasa hle.

Obama hian a hmain mezial a heh ve hle ṭhin a, a nghei a, a nghei hnu hian nicotine gum a ṭhial deuh ta reng thung. Republic Day lawm a nih lai a, PM Modi-a bula a ṭhut lai pawh a ṭhial ṭâwlh ṭâwlh a, TV-ah a lang chiang ang reng sia, an sawisel nasa hle a ni.

Ṭhenkhat chuan, "Barack bhai-a ka chu kêl châwl ang mai a ni... ṭhial nuau nuau reng mai," tih te, "Gutka lam a ni lo hlauh" tih te, "Formal parade lai laia" tih te leh hei aia tum tlang fe fe pawh a tam mai.

Obama hian ṭhelret hi a ṭhial nasa mah mah a ni. China-ah pawh khan an lo sawisel tawh. China-ah phei chuan chewing gum mi hmaa ṭhial nuau nuau hi inzahlohna anga ngaih a ni lehnghal sia. China blogger ten nasa takin Obama hi an ching zui hrep a, 'President pawh a ang lo, hip-hop artist ni âwm zawk a ni' titein an sawi bawl bawl mai. China-ho phei chuan an lo ngaisang tehchiam bawk si lo nen.