Mi hausa an hausa tial tial

Khawvelah mi hausa aiin mi rethei an tlem zawk tih kan hria a, mi hausate hausakna leh thiltihtheihna a nasa tial tial a, khawvel hausakna tam zawk hi mi hausa tlêm tû kutah a awm hnem tial tial a ni.

Intluktlanna sawi sawi mah ila, a tak takah chuan a theih loh. Hei hi Oxfam report aṭang hian a chiang mai. Oxfam chuan an zirchianna an tihchhuahah, nakkumah hi chuan khawvel hausakna zatve zet hi khawvela mi hausa, khawvel mihring aṭanga chhuta zaa pakhat chauh hian an thunun tawh dawn a ni.

Mi hausa ber ber mi 80 te hausakna belhkhawm hi dollar tluklehdingawn 1900 zet a ni a, hei hi khawvel mihring tluklehdingawn 3.5 te neih zat ang hu a ni! Nikum kha chuan billionaire mi 85 te hausakna belhkhawm leh mipui tld 3.5 te hausakna belhkhawm hi a intluk ṭhin a, chumi awmzia chu mi hausate hausakna hi nasa takin a pung tihna a ni.

Kum 2002 aṭanga 2010 chhung khan khawvela mi rethei ber ber zatvete sum neih punna rate leh billionaire-te hausakna punna rate hi a inthlau lo hle ṭhin. Mahse kum 2010 hnu aṭang hi chuan a inthlau hle tawh a, mi retheite sum neih hlut zawng hi a kum têlin a tlahniam tawh a, ṭhan lam a pan lo. Chutihlaiin mi hausate hausakna erawh a pung chak sawt hle.

Khawvel pumah hian ni khata an khawsakna senso zawng zawng chhuta dollar 1.25 hnuai lama khawsa (rethei) hi tluklehdingawn 1 vel zet an awm.