The Batman-ah Superman kan hmu dawn em ni?

Matt Reeves-a film siam mek, Robert Pattinson-a channa 'The Batman' hi mi tam tak ngaihdan chuan DCEU huangah a tel lo a ni mai thei, mahse tunhnaia thlalak darh chungchang vang erawh chuan mi tam tak ngaihdan a dang mai thei!

Robert Pattinson-a Batman hi 'Justice League'-ah a tel dawn em, dawn lo em tih chungchang engmah sawi la ni lo mah se The Batman shooting an neih lai thlalak leak pakhatah Superman suit ha hmuh tur a awm a, chu chuan DC fan-te mit leh beng a tivir hle.

Onlooker pakhat Sam McGaw chuan London-a film shooting an neih lai thla lo la fuhin chutah chuan Superman thuama inthuam pakhat hmuh tur a awm a ni. Mahse report pakhat chuan Batman film thar tura Halloween party scene-ah Superman thuama inthuam hi a lang dawn niin an tarlang a, thu a saisa ta nuai rih a, engpawhchunise Superman thuama inthuam hrim hrim chu a lang ngei dawn a nih hmel.

'The Batman' production hi hripui leng vangin hun rei tak chhung an chawlhsan hnuah bul an ṭan leh chiaha Pattinson-a berin Covid-19 a kai leh tak avangin an chawl leh lailawk a, mahse tunah chuan inkhuahkhirhna dan thar kalpui mek chungin Liverpool-ah shooting an ṭan leh tawh a ni.

DC Fandome-a 'The Batman' trailer hmasa ber tarlan a nih aṭang khan Batman fan-te chu an phur thar hle, an beisei ang ngeiin a 'dark' dawn niin a lang a, Pattinson-a Bruce Wayne hmel pawh a uang dawn lo hle tih a hriat tawh a, action film hmuhnawm tak a ni dawn tih a chiang nghal.

Hripui leng vanga film production chawlhsan reng a ngaih avang khan Nakkum October-a tlangzarh an tum pawh chu kum 2022 March thlaa thlangzarh an tum ta zawk bawk.

Kar hmasa khan an shooting nei lai thlalak pakhat leak a awm bawk a, chutah chuan Collin Farrell-a 'Penquin' tur langin Farrel-a ni tih hriat loh khawpin an chei danglam a, chu chuan sawi zui a hlawh hle a ni.