Box Office: 'Despicable Me 4' a la chungnung zel

North American box office-ah Gru leh minions-ten ro an la rel chhunzawm zel a, a kar hnihnaah 'Despicable Me 4' chuan No 1 dinhmun a la hauh.

Tlangzarh kar aṭanga ticket sales tlakhniamna hi 40% chauh a la ni a, USD mtd 44.7 lak luh belhin, North America-a sum a hmuh chhuah hi USD mtd 200 a chuang tawh a, khawvel puma a sum lak luh hi USD mtd 438 a tling tawh bawk.

Indie horror film, 'Longlegs' chuan rin phak bakin thawm a rawn nei lian a, No 2-ah a lang. Maika Monroe leh Nicholas Cage-te channa hian USD mtd 22.6 la lutin, film chhuak thar vek, Scarlett Johansson leh Channing Tatum-te channa, 'Fly Me to the Moon' sum hmuh let zet a hmu thei a ni. 'Longlegs' writer leh director hi Osgood Perkins niin, he film hi Neon film tihchhuah tawha tlangzarh kara sum la lalut hnem ber leh, kumina R-rated film zinga che ṭha ber a ni bawk.

Star langsar channa ni mah se, 'Fly Me to the Moon' chuan beisei a pha lo a, USD mtd 10 a la lut thei ṭawk a, No 5-ah a lang pha hram.

'Inside Out 2' chu a kar nganaah pawh No 3-ah a la awm a, USD mtd 20.8 a hmuh belh leh. Khawvel huapa a sum hmuh hi USD tld 1.35 a tling tawh a, 'The Super Mario Bros. Movie' sum hmuh zat a khum thei ngei dawn e. USD mtd 11.8 la luttu, 'A Quiet Place: Day One' chu No 4-ah a lang bawk.