Feli Fanai hla a put ru

Lo tidarh lo turin mipuite a ngen

Collection album an buatsaih meka mi tur, Feli Fanai hla, 'Ti Ve Mai La' tih chu a demo version a put ru a, Feli Fanai leh he album neitu, Anggu Ralte te chuan mipuite lo tidarh lo hram turin an ngen.
Feli Fanai hla 'Ti Ve Mai La' hi Anggu's Volume I album-a mi tur a ni a, demo version chauh a ni. Nikum kumtawp lam aṭanga darh ṭan a ni a, computer-a mi tuten emaw an ruk chhuah niin an hria. Nikum khan a la darh tam vak lo a, kumin aṭangin a darh nasa ta hle a, hemi chungchangah hian Feli Fanai chuan, "Khawngaih takin mipuite lo tidarh lo turin ka ngen che u, full version ngaihthlak tur a awm thuai mai thei a ni," a ti. April thla hian tihchhuah theih an inbeisei. Feli chuan, "A nei tawhte pawhin midang lo pe chhawng lo hram se kan duh a, kan ngen mawlh mawlh a ni," a ti bawk.
Tuna hla putru chinah hian guitar leh part dang a la awm mang lo a, voice deuh chauh a la ni a, a la kim lo hle. Music video-a siam tura ruahman a ni a, tunah hian buaipui chhoh mek zel a ni. Album neitu tur Anngu chuan, "Rinhlelh kan nei thiam lo a, computer aṭanga tuten emaw an ruk chhuah niin kan ngai ringawt. Chutiang a nih ngawt loh chuan a put theihna chhan tur dang kan hre lo a ni," a ti.
Anggu's Volume I hi lengzem leh fakna hla dahkhawmna tur album a ni a, heng huang chhung pahniha zaithiam kan neih ṭhatte chu an fuankhawm ṭha hle dawn. Lengzem bikah hian Feli Fanai, Lawmi Khiangte, DJ Lalvenhimi, Michelle Varte, Christy Zaithanchhungi, Famkimi Kawlni, Josephine (Jojo), Manuna (Hard Ray), Henry Lalmalsawma Renthlei leh Zualbawihi te an zai ang.
Fakna lam hla sa turte hi Grace Lalchhanhimi, Lancy Remlalhruaii, Mali Sailo (Mizo Icon), C. Lalrindiki (Didiki), Daniel Lalrinmawia leh Zorinsangi Sailo te an ni ang. He album-a hlapui ber, a zai zawng zawngten a huhoa an sak, Zonun Zemawi tih chu kar leh tawp lam hian tihchhuah an tum.