John Depp-a chhuanlam a mak!

Press conference-a kal tur a ni a, mahse a kal lo. A kal lohna chhan a sawi hian press mite a tihlim hle. A kal lohna chhan hi thawnthua ramsa, a tak tak hriat loh, chupacabra-in a beih vang niin Johnny Depp chuan a sawi.

Thawhlehni khan Tokyo-ah press conference neih a ni a, hetah hian Johnny Depp hi inlan tur a ni. Kum 51 mi actor hian press conference awm ni hian a damlo a, mahse hei hi a kal lohna chhan a ni lo tih sawiin, a kal lohna chhan chu chupacabra-in a beih vang a ni, a ti. A rinawm viau lem loh!

Chupacabra hi North America vel chauha awm nia sawi ṭhin a ni a, mahse a awm ngei leh ngei loh hi finfiah a la ni lo. He ramsa hi thawnthu sawia an sawi a ni a, kum 1995 khan Puerto Rico-ah a piang niin an sawi a, mihring ran vulh thisen a hipsak ṭhin niin an sawi.

Mexico-ah hman deuh khan beram 35 lai chu mak deuhin an thi a, mi tam tak chu chupacabra tihhlum niin an ngai a, mahse hmu an awm lo. Kum 2013 khan Belarus-a mi chuan a hmu niin a insawi a, a sawi chiang thei chuang lo. Mississippi-a pa pakhat chuan a kaphlum niin a sawi bawk a, finfiahna rintlak a awm lo.

Chupacabra hi ui lam chi, hmul nei lo niin an sawi ṭhin. Scientist-te chuan a awm tak tak a nih pawhin thisen dawt ramsa ni loin, sihal emaw, ui emaw, chinghnia emaw, natna eng emaw vei a ni ang, an ti.