Andressa Urach-in plastic surgery-ah Hmeichhe dangte thu chah

Brazilian model, plastic surgery a hman nasat avanga tuna thih mai hlauhawm aw, Andressa Urach chuan hmeichhe dangte plastic surgery hman chungchangah fimkhur turin a chah.

Andressa Urach hi model a nih mai bakah Brazil-a mawng nalh an thlana pakhatna pawh lo la tawh a ni. A taksa tihnalh lehzual tuma plastic surgery a ti chu a taksain a zo lo a, tunah hian damdawi inah enkawl mek a ni a, a thih ngei ring an tam zawk.

Brazil TV chuan hman ni khan a kawm a, ani hian damdawi in khuma mu chungin interview hi a hmachhawn a ni. Urach chuan, "Midang aia nalh ka tumna lutukna lamah ka taksaah tûr tam tak ka thun a, chu chu ka tuar ta lo a ni," a ti.

Nikum November thla khan a thi tawh ngei tura ngaih a ni a, life support hmunah dah a ni a, mahse vanneihthlak takin tun thlengin a la dam a, enkawl mek a ni. Brazil sorkar dana silicone gel mihring taksa chhunga dah theih tur zat aia tam, a let 200 zeta tam a thun a, chu chu a taksain a hipral (absorb) thei ta lo a ni. Hetiang chi hi zaa 25 chu thi ngei ngei tura ngaih an ni.

TV hmaah Urach chuan, "Tuna ka awm dan hi in hmu vek a" tiin, damdawia an enkawlna khuma mu chungin, a ke aṭanga thisen chhia leh silicone-te an lak chhuah mek chu a kawk a, "Hmeichhe tam tak tan hei hi warning ni nghal se ka duh a ni," a ti.