Fashion Fiesta

Changkang kan tehna pakhat, incheina khawvel ṭhang mekah hian atu ate pawh hian, abikin tlema inchei ngaina ti teh ang, brand ṭha leh changtlung kan melh ta vek mai. Heng Company liante hi a ṭhat leh tlo avanga duh hi chu tlemte kan nih ka ring. Inlak changkanna chi khat atana heng brand thawmhnawte hi kan intihhmuh ni berin ka hria. Tlema kan uteho, 30's pel lam tawh chuan a ṭhatna leh tlona vangin an lei tlangpui a, ṭhalai lam erawh chuan incheina chi khat, kan uar thut ang deuh hian tunlai nan kan inbel a tih theih deuh vek ang. Enga pawh chu nise kan neih sumin a daih a, kan chhungten rem an tih a, kan lungawina tak a nih chuan tu lo sawi theih ni suh. Aizawl ṭhalaite ngaihsan rawn brand larte thlir dawn teh ang. Sports wear brand-ho ka sawi dawn emaw i lo ti ang nge. Show room rawn nei ho ni loin tun ṭum chu online leh sumdawng ṭhenkhatin foreign lam aṭanga an rawn chawh luh takho hi i belchiang dawn teh ang.

Designer lian tak tak Dior, channel thawmhnawte zawng kan lei theih turin rawn chhawp chhuak mah se, kan ram dinhmun hian la zir miau hek lo, lo awh ngawih ngawih leh a first copy lo lei kha kan tih ve theih chu a ni mai. Chuti a nih si chuan a aia tlema man tlawm, branded ni tho si, changkang ve tho, tunlai ṭhalaite mil tur bawk si kan zawn a lo ngai ta a, heng high-end brand - Zara, Nine West, Vanilla moon, Forever New, Forever 21, ALDO, Charles & Keith, Mango tih teho hi kan sum leh pai dinhmunin a mil tawk a nih miau avangin kan lei leh ta pawh a niang chu! A hming kan hre hlur a, kan thawmhnaw bawmah pawh a inkhai dul a, khawi lam siam, khawi lam aṭanga lo kal nge tih ngaihtuah chu kan tlem khawp ang le.

ZARA - Ṭhalai incheina ngaina ve tawk tan chuan hriat loh a zahthlak tlat! Nu valai lamah phei chuan a tla na hle. Kan fate tan lah kan duhpui bawk. He Spanish brand lar tak hi 1975 daih tawh khan Amancio Ortega chuan thawmhnaw siam chhuahna ropui tehchiam bik lo tak mai, Arteixo a nei a, chu chu tihchangtlun lehzual tumin La Coruna-ah dawr a hawng a, a tir chuan he company tum ber chu anmahni aia brand lian leh changtlung zawkte thil siam chhuah chu a design entawna mipui mimir tam zawkina an lei ve theih tura chhawp chhuahsak a ni. Hei vang tak hian duh leh ngainatu a tir phat aṭangin a ngah phah ta reng a. Brand dang ten kum khata design 2000 vel chauh an siam chhuah theih laiin Zara erawh chuan 12,000 chuang an siam chuak hman ṭhin. An hlawhtlinna pakhat leh chu an customer-te an zir chiang a, an duh zawng milin an design leh siam chuah te an her rem zung zung a. Thla 3/4 ngai loin kar 3/4 lekah design thar a chhuak zung zung a. An design zinga hralh kal lo chu a design an siam nawn leh ngai lo. Kar khat lek pawh ni se, order nen lam an titawp leh vek ṭhin. A dangdai leh em emna chu advertisement an ti ngai lo. Anmahni fakna lam hawi leh mipui huikhawmna tur ang chi an ti lem lo bawk. Chuti chung chuan an thil siam chhuahte a ṭhat leh ṭhat loh chu kan hre vekin ka hria, sawi ngaiah ka ruat lo. Heti chunga khawvel hriat khawp an ni thei hi an danglamna tak pawh a ni.

A tir lama bag ah chi chauh zuar chhuak ṭhin kha 1995 hnu lamah thawmhnaw, pheikhawk, naupang thuam thlengin Nine West, Connecticut-a kum 1983-a bul ṭan chuan an siam chuak ta zel a, an rawn lar tak vakna pakhat capsule collection an tih, kum 2006-a designer lar Vivienne Westwood thakoon leh kokosalaki te nena limited edition an siam chuah aṭangin khawvelin a hriat lar phah ta em em a. Brand naupang tê mah nise India hmar chak state tenauah pawh a hming kan lam rik tak mawlh mawlh hi. Sap hming pu si, sap hoin an siam chhuah ni awm tak, Charles & Keith hi nuihzatthlak ang reng takin unau Charles Wong leh Keith Wong ten 1996 khan Singapore-a shopping mall-ah an din ve rawih a, vawiina kan nula ten an nalhpui tak em em leh, puipun nikhuaa an pheikhawk siam chhuah bun phak chu kan intihtheih tak chem chem chhan pawh hi an zar kan la zo zel ni e.

Kum 20 liam ta khan Spain rama website pakhata Online store-a an thawmhnaw siam chhuah an pho chhuah aṭanga khawvelin a hmelhriat tak, Mango, Spanish brand lar tak hi khawvela thawmhnaw siam chhuaktu Company lian tak a ni ta. An thawmhnaw siam chhuahte hi belh chian a dawlin an pheikhawkte phei chu bun nuam leh ṭha tak tak an ni.

Thlahtute aṭanga pheikhawk siam, chhung­kaw sumdawnna ni pah fawmin a pu leh a pa ten an zawrh leh pheikhawk chhe siam hna an thawh ṭhin chu duh loin ALDO Bensadoun chuan a suangtuahna khawvela mite mamawh leh duh phuhruk tum ranin, kum 1972 daih tawh khan Montreal Canada-ah bul a lo ṭan daih tawh a, chhungkaw eizawnna atan a hmuh angin a tu leh a tu chhuante thlengin eizawnna atan an hmang ni. An thuamhnaw, a bikin pheikhawk te hi fak vak ngaiah ka ruat lo; kan ṭhalai ten an hmelhriat hneh hle. Designer 60 chuang laiin he Company lian tak hi an vil tawh a, thil ṭha leh nalh tak hmuh zel i lo beisei ang u. Sawi vek dawn ila ka sawi seng lo ang, heng baka brand lar leh ṭha zawkte chu hun dangah kan bel chiang leh dawn nia. A pawimawh ta ber chu branded thawmhnaw kan ngaihsanna, kan inneih changkan siakna khawvelah hian chhungkaw dinhmun mil leh mahni sum leh pai thawh chhuah mila inchei hi a ṭha in a tlo ber, kan ti zeuh teh ang.

Tluangpuii Hmar
Instructress
Vakiria institute of fashion technology