September thlaa album tlangzarh tur langsar zualte Lana Del Rey album thar naktukah
Kumin chu hripuiin khawvel a tibuai a, rimawi khawvel pawh kumdang angin a 'happening' lo riauin a hriat. Mahse 'ber' thla kan chuangkai ta bawk a, zaithiam lar tak tak zingah tun thla chhunga album tlangzarh tum an awm nual. Covid-19 vanga an inkhung hmang ṭangkaiin hla an phuahte pawh a ni mahna, zaithiam langsar tak takin tun thla chhung hian album an tlangzarh dawn a, chung zingah chuan Lana Del Rey leh Machine Gun Kelly-te pawh an tel.
Lana Del Rey 'Chemtrails over the Country Club'
American singer Lana Del Rey chuan naktuk, September 5 hian a studio album pasarihna a tlangzarh dawn.
Lana Del Rey album thar tur hi 'Chemtrails over the Country Club' tih a ni dawn a, naktukah mai hian tlangzarh dawn mah se nimin thleng khan he album-a hla awm tur hi pathum chiah hriat a la ni. Zaithiam ṭhenkhat chuan an album tlangzarh hmain a tracklisting-te an tichhuak ṭhin a, Del Rey erawh a music genre danglam ang bawkin zaithiam dang ang a ni ve lo a, nasa takin a puangzarh lawk ve lem lo.
Nikum August-a 'Norman Fucking Rockwell!' album a tlangzarh ni khan a album pasarihna tur a buaipui leh mek tih a tarlang a, May 21 khan September 5-ah a album a tlangzarh dawn tih hi puang chhuakin, May 25 khan a album title tur hi Instagram-ah a puang chhuak leh bawk.
Word Trade Centre sut chhiat champhaah Marilyn Manson album thar
American rock band Marilyn Manson chuan Word Trade Centre sut chhiat champha, September 11 hian an studio album 11-na 'We Are Chaos' an tlangzarh dawn.
Nikum March thla khan an vocalist Marilyn Manson chuan album thar an buaipui thu hi a sawi a, tun thla chhung hian kan ngaithla thei dawn ta a ni.
Machine Gun Kelly 'Tickets to My Downfall'
Megan Fox nena boruak nei ngah tak Rapper Machine Gun Kelly chuan September 25 hian a album thar 'Tickets to My Downfall' chu tlangzarh a tum ve bawk. MGK album thar turah hian Blink-182 drummer Travis Barker chuan a pui a, The Used member Bert McCracken leh Yungblud-te pawhin an pui bawk.
'Tickets to My Downfall' hi MGK studio album pangana tur a ni dawn a, he album-a mi tur hi single pathum a tlangzarh tawh a ni.
September 11 hian Everything Everything chuan an album pangana 'Re-Animator' an tlangzarh dawn bawk a, September 25 vek hian Idles chuan 'Ultra Mono' an tlangzarh dawn bawk.