Billboard Hot 100-ah Kendrick Lamar 'Not Like Us' ; Album chart-ah 'Tortured Poets Department' bawk langsar

Billboard Hot 100 song chart-ah Kendrick Lamar chuan 'No Like Us' hla chu No 3 aṭangin No 1-ah a rawn kir a, chart hmahruaitu a ni ta.

'Not Like Us' hi kar kua liam taa tlangzarh kha niin, tlangzarh aṭang hian kar riat chhung chu No 2-6 inkarah a awm chho a, a kar kuanaah No 1-ah a rawn chho ta a ni. He hla hian stream mtd 50 leh radio airplay mtd 40 zet a nei. Lamar hian tun hnaia Los Angeles-a 'The Pop Out' concert a neihah vawi ruk zet a sa a ni.

Shaboozey 'A Bar Song (Tipsy)' chu No 2-ah a tla thla ve thung. 'Tipsy' hi black male artist hla zinga Hot 100 leh Hot Country Songs chart-a No 1 ni thei hmasa ber a ni. Hot 100-ah hian Post Malone 'I Had Some Help' chu No 3-ah a lang bawk.

Billboard 200 album chart-ah chuan Taylor Swift 'The Tortured Poets Department' bawkin hma a la hruai a, a zawnin kar 12 chhung No 1 dinhmun a hauh tawh a, Swift album zingah No 1 ni rei thei ber a ni. Kar 11 chhung No 1 a lo nihpui theih, '1989' leh 'Fearless' record a rawn khum ta a ni. Zach Bryan 'The Great American Bar Scene' album chu No 17 aṭangin No 2-ah a rawn invawrh chho bawk a, Morgan Wallen 'One Thing at a Time' chu No 3-ah a tla thung.