Adele-in chawlh la dawn

British singer/songwriter, Adele chuan Las Vegas-a 'Weekends with Adele' residency a neih mek chu a tawp hunah rimawi lam aṭangin chawlh a la dawn tih a sawi. A residency hi November 23 hian a zo dawn a ni.

German broadcaster ZDF in a kawmnaah Adele chuan music thar siam turin ruahmanna engmah a neih rih loh thu leh, rimawi lam chu hun eng emaw chen chawlh san rih a duh thu a sawi. Las Vegas residency hi kum 2022 November aṭang khan Ceasers Palace-a The Colosseum-ah a nei ṭan a ni. Music aṭangin chawlh la mah se, Adele hian creative field lam tan a inhawng reng dawn tih a sawi a, film lama thawhte chu a lo suangtuah ṭhin thu a sawi.