China-ah Warcraft a hit zel
US-ah a hlawhtling mang lo nangin, Warcraft siamtute hian US-a a hlawhtlin kher an phut lo ang, China-ah a hlawhtling rem rem em mai. China-ah hian US mtd 200 chuang Warcraft hian a thawk chhuak der tawh.
China-ah hian July 8
aṭang khan chhuah ṭan a ni a, an chhuah kar tawpah khan USD mtd 48.7 a lalut a, a la hlawhtling zel a, tunah chuan USD mtd 206 zet a lalut tawh. Ram dang film, China-a kumina an tihchhuah tawhah chuan Zootopia hian sum a lalut hnem ber a, USD mtd 235.4 a lalut tawh a, hei hi a rawn khum theih ngei rin a ni.
US-ah chuan pakhatna pawh a ni phak lo a, mahse US pawn lamah a hlawhtling hle a, a bikin China-a a hlawhtlinna hian a pui hle. Tun thlengin Warcraft-in khawvel pum aṭanga sum a hmuhchhuah tawh zawng zawng chu USD mtd 377 lai a tling tawh a ni.
US box office-a pakhatna, Nemo film chhunzawmna Finding Dory chu China-ah hian pahnihna a ni a, kar tawp ni thum chhung khan USD mtd 18.2 a lalut. X-Men: Apocalypse chu pathumna niin, USD mtd 15.7 lai a la hmu tling thei.