'Marvel's Avengers'-in PlayStation history a siam

Publisher Square Enix chuan Nilaini khan 'Marvel's Avengers' game beta chu PlayStation history-a beta download tam ber a nih thu an tarlang.

Beta ringawt hi mi maktaduai 6 velin an khel tawh a, heng mite'n game khelhna atana hun an hman belhkhawm hi darkar mak­ta­duai 27 vel a tling niin Square Enix chuan an tarlang a ni.

June thlaa Summer Game Fest War Table-ah khan Marvel's Avengers gameplay hi game developer chuan an tarlang a, khel chaktu pawh an tam hle tih tuna record an siam aṭang hian a chiang hle a ni. Game kheltute chuan  Captain America, Iron Man, Hulk, Thor, Black Widow leh Ms. Marvel character-te hmangin game hi an khel thei dawn a, voice cast zingah pawh Nolan North leh Troy Baker-te an tel.

Vawiin hian  Stadia, Microsoft Windows, PlayStation 4, leh Xbox One-a khelh theih tura tlangzarh a ni dawn a, gamer tan chuan game ngaihven chi tak a nih ngei hmel.