Zaninah ‘Music Travel Love - Live in Aizawl’

Alpha Omega bultumin zaninah ‘Music Travel Love - Live in Aizawl’ chu LPS Arena, Falkland vengah neih a ni dawn ta.

Khawvel huap pawha hriat lar, YouTube lama band ngaihven hlawh 'Music Travel Love' (The Moffats) chuan concert nei tur hian July 17 khan Aizawl an rawn thleng a, zaninah an zai ngaihnawm tak leh an chetla te kan ngaithlain kan thlir thei dawn ta e.

Music Travel Love hian nimin khan an music video thar tur, 'Love will keep us alive' tih chu Reiek Tlangah shooting an nei a, thing an phun nghal bawk.

Zanin concert turah hian tlai dar 4 aṭangin gate hawn a ni dawn a, tlai dar 5 aṭangin pre-event neiin, Noah's Foundation School Choir leh Evenflow an zai ang. Official opening act hi zan dar 6:30 ah ṭan a ni ang a, kan Mizo artist leh band neih ṭhat, Licac & Jacks leh Shai Hills ten an inlan dawn. Hei bakah Music Travel Love Inter School Singin Competition-a winner leh runner up te an perform dawn bawk. Zan dar 8:00-ah gate khar a ni ang.

Nizan khan Conference Hall, Ransam, Ṭhuampui Vengtharah press conference an nei a, zanin concert neih turah hian hla 20 vel an sa thei dawn a, The Moffats band anga an hla pali an sa tel dawn a, heng zingah hian 'Miss you like crazy' pawh a tel tih an sawi. Mizoram chu India ram state pahnih an tlawhna a nih thu sawiin, Mizo artist ṭha thawhpui an chak thu leh, MYC Perkhuang 2021 winner Daniel Lalawmpuia chu a aw mawi an tiin, la thawhpui pawh an duh tih an sawi bawk.

Music Travel Love hian clothing brand NoEx an nei a, kawr leh lukhumte zuarin, online-in a chah theih a ni.