Zorina music video thar a chhuak dawn

Mizo gospel artist mipa kan neih ṭhat zinga mi, Zorinsanga Sailo chuan kum khat chuang zet video a siam tawh loh hnuah music video thar a ti chhuak dawn ta. A hla thar tur hi 'Min hruai turin ka thlang ber che' tih a ni a, T Laldintluanga, Synod Choir conductor hlui phuah a ni.

Zorina chuan nikum December thla aṭanga a aw bawm vung vanga hun rei tak zai thei loa a awm hnuah, hla thar ṭha leh mawi tak a nei leh thei chu a lawm hle tih a sawi. A music video hi ZM Traders-in an sponsor a, recording hi HC Recording-ah tiin, sound track hi Ruatdika Ralte siam a ni. Music video hi Merky Studio-ah an shoot a ni. Music video hi Zonet-ah tih chhuah a ni dawn a, T Laldintluanga YouTube channel ah en theihin a awm bawk ang.

'Min hruai turin ka thlang ber che' tih hla hi Laldintluanga hian kum 2014 kuma a phuah a ni. "Ka nun pumpui min hruai tura Lal Isua ka sawmna hla a ni" tiin, "Reilote hlimna chena khawvel lama tlan ai chuan ka thlang zel dawn che Lal Isu tia inhlan mawlh mawlhin ṭawngtaina nen he hla hi ka lo phuah chhuak ta a ni" a ti.