Emmys 2024 nomination : 'Shogun' in nomination 25 a hmu

Television Academy chuan 76th Emmy Awards nomination a puang a, Japanese drama 'Shogun' chu nomination hmu hnem ber niin category 25-ah nominee a ni. Actor Sheryl Lee Ralph leh Tony Hale-ten nominee hi an rawn puang a ni.

US TV industry-a chawimawina ngaihhlut ber, Emmy Awards 2024 hi September 15, 2024 hian Los Angeles-a Peacock Theater-ah neih a ni dawn a, host tur hi an la puang lo. Hemi hma, September 7 leh September 8 hian Creative Art ceremony-ah Emmy trophy tam zawk hi chu sem a ni ang.

Hollywood actor leh writer-te nawrh huaihawt vangin nikum khan Emmy Awards hi sem a ni lo a, kumin January thlaah Emmys 2023 hi sem a ni ta zawk a ni. September thlaa sem tur hian June 1, 2023 - May 31, 2024 chhung a huam ang.

TV Academy-ah hian member 22,000 awmin, anni hian drama, comedy leh limited/anthology series thehluh aṭangin nomination tur hi an thlang a ni. Kuminah hian series an thehluh hi 229 a awm a, nikum aiin 33% in a tlem zawk.

Nomination hmu tam ber, 'Shogun'-a changtu Hiroyuki Sanada leh Anna Sawai te chuan lead actor leh lead actress-ah nominee an ni bawk. Nomination hmu tam dangte chu 'The Bear' (23), 'Only Murders in the Building' (21), 'True Detective : Night Country' (19) leh 'The Crown' (18) te an ni.

David Beckham Netflix documentary, 'Beckham' pawhin Emmy nomination hi panga a hmu a, heng zingah hian Best Documentary or Nonfiction Series pawh a tel. Tun ṭum nomination-ah hian Netflix series 107 zet an lang. FX series 91 leh HBO aṭangin 91 chu nomination-ah hian an lang bawk.

Best Drama series-a nominee-ah hian The Crown, Fallout, The Gilded Age, The Morning Show, Mr and Mrs. Smith, Slow Horses leh 3 Body Problem-te an lang.