Retro 1972 Olympics Sneakers fakna atan Bella Hadid hman vangin Adidas in sawisel a tawk

Adidas company chuan retro 1972 Olympics Sneakers fakna atana langsar taka Palestinian thlawpna leh Israel dodalna lantir ṭhin, model Bella Hadid an hman avangin American Jewish Committee chuan an sawisel a, company hi hetianga a tih chhan an zawt bawk.

He ads campaign hi Munich Games-ah Israel coach leh infiammi 12-te Palestinian firfiakten an thah champha vawi 52-naah tih chhuah a ni. Palestinian firfiak, Black September group chuan kum 52 liam ta khan Olympic Village luh khungin Israel mite hi an man a, a, hnuah an that zui leh a ni. AJC chuan Ningani khan thuchhuah siamin, '1972 Olympic Games, Munich-ah Israel mi 12-te Palestinian firfiakten rawng takin an that a, hetih lai hian Adidas chuan he Olympic hriatrengna puala a thil siamah Israel dodaltu model ngei a thlang hi a thlir zau lo nge, a tum reng zawk. Hei hi pawm theih a ni lo ve ve a, insawifiah turin kan phut a ni," a ti. Adidas chuan he thil thlengah hian thupha a chawi nghal a, an tum reng a ni lo tih sawiin, mi dangte rilru natna an thlen avangin ngaihdam an dil tih a sawi. Ads campaign pawh hi an siamṭha leh nghal tih an sawi bawk.

Social media lamah pawh Adidas-in Munich Olympics hriatrengna puala ads campaign-a Bella Hadid hman a ni hi Israel mi leh Israel thlawptu lam chuan an sawisel zui nasa hle a, Hamas firfiak thlawptu a ni tiin, hetianga company lamin an hmang hi an hriatthiam loh thu an sawi nasa hle. Hadid-i pa, Mohamed Hadid hi Palestinian immigrant a ni.