Indian gaming industry-in GST tih hniam an dil

India sorkarin union budget a pharh turah games-a GST lak zat chu ti hniam turin ngenna an thlen.

Indian gaming company 70 intelkhawm chuan Prime Minister Office leh Ministry of Information and Broadcasting-ah petition an thehlut a, video games-ah GST lak ṭhin 18% chu 12% a ti hniam turin an ngen. Hei hi ram chhunga gaming industry-in hma a sawn theihna tur leh, game developer-te sum lak luh a pun theihna turin an ti a ni.

Indian Digital Gaming Society president leh chairman, Rajan Navani chuan India ramah esports leh video gaming sector chuan theina sang tak a nei a, gamer talent nei ṭha tak tak pawh an awm tih a sawi. Mahse hma sawn tur leh, khawvel ram dangte el tur chuan budget pharh turah pawh an thlawp ṭhat ve a ngai tih a sawi. Original esports leh video gaming content siamtu studio-te tan chhiah tih tlem a, high-quality games siam chhuah a nih theihna atana infrastructure lama investment tihte a pawimawh thu a sawi.

NODWIN Gaming co-founder, Akshat Rathee pawhin gaming leh esports pawimawhnate sawilangin,"Esports hi national leh international sports federation hnuaiah a awm tawh a, sports budget-ah hemi puala investment tih pun a, national games Khelo India-ahte telh a nih chuan a hlawkpui hle dawn a ni," a ti. SuperGaming CEO Roby John pawhin budget tharah hian game development, infrastructure leh talent development puihna tur an telh ngei an beisei thu a sawi ve bawk.

Gaming industry chuan real money games (RMG) leh video games chungchang pawh chiang taka thliar hrang tura an duh thu an sawi bawk a ni. Union budget hi July 23 hian Union finance minister Nirmala Sitharaman chuan Parliament-ah a pharh dawn a ni.