Nicole Kidman leh Keith Urban-te'n Australia ram kang ṭhelhtute tan $500k an pe

Nicole Kidman leh a pasal Keith Urban-te chuan Australia ram kang ṭhelhtute tan dollar nuai nga an pe.

'Big Little Lies' actress hian a instagram-ah Australia ram kang tuarte chu an chhungkuain an thlawp thu leh, an ngaihtuah takzet bakah an ṭawngṭainaah an hre reng tih sawiin, kangmei ṭhelhna tura nasa taka hna thawktu Rural Fire Service-te tan  $500,000 an pek thu a tarlang.

Keith Urban pawhin ṭanpuina an pek thu hi a tarlang ve bawk a, mahse pawl an pekna a tarlan erawh a dang thung.  Pink pawhin Australia ram kang ṭhelhtute tan hian   $500,000 tho a pek dawn thu a lo sawi ve tawh bawk. A instagram-ah Australia ram kang chu hmuh hrehawm a tih thu leh kang ṭhelhtute tan   $500,000 a pek dawn thu a tarlang ve bawk a, anni bakah hian Naomi Watts, Hugh Jackman leh  'Suicide Squad' star Jai Courtney-te pawhin chhawmdawlna an pek tur thu an tarlang tawh a ni.

Keinin thlasik hun kan hman mek lai hian Australia chuan khawlum vanglai an hmachhawn ve mek a, ramkang vang hian nikum November thla vel aṭang khan harsatna nasa tak an hmachhawn tawh a, ziaawm lam a la pan thei lo a ni.