Asia-a zirna hmun ṭha zingah A vawi khat nan top 30-ah India zirna a lang

India rama zirna hmun kan neih ṭhatte hi khawvel huap chuan a turu lutuk lo ṭhin a, mahse kuminah e≠rawh chuan, a vawi khat nan Asia-a zirna hmun ṭha top 30-ah India aṭangin IISC a lang.

2016 Times Higher Education (THE)-in Asia University Ranking a tihchhuahah hian a ṭha zual thlan chhuahah India rama zirna inte lang hnem lem lo mah se, South Asia-a university zingah erawh chuan nei ngah ber a ni thung. Top 30-a lang hi Indian Institute of Science, Bengaluru (IISC) a ni a, 30-na chiah chiah a ni.

Asia-a university zinga ṭha bera Times-in a thlan chhuah chu National University of Singapore a ni. Singapore hi Asia-a zirna hmun ṭha ber ber awmna a ni a, pahnihnaah pawh China-a Beijing-a mi Peking University leh Singapore-a mi tho, Nanyang Technological University te an awm a; pakhatna leh pahnihnaa Singapore university-te an awm kawp ṭum lina a ni ta. National University of Singapore hi kum 2015-16 chhung khan khawvel huap zirna in ṭhaah chuan 26-na a ni.

Top 10-ah hian Singapore-a mi pahnih, China-a mi pahnih, Hong Kong-a mi pahnih, Japan-a mi pakhat leh South Korea-a mi pathum an lang a, an vaiin univeristy 11 top 10-ah hian an lang. A pumpui thuah East Asia lama zirnate an
ṭha hlawm a, East Asia tihah hian China, South Korea, Japan leh Taiwan te an ni a, South East Asia-ah Singapore chu a langsar ber a ni. Top 20-ah hian East leh South East Asia rama mi ni lo lang pha pahnih chu Hebrew University of Jerusalem leh Tel Aviv University, Israel rama mi ve ve te an ni. Top 50-ah East Asia ramte leh Singapore ni lo, ram dang lang pha chu Turkey, India leh Saudi Arabia te chauh an ni.

India rama zirna in bikah chuan, THE-a top 100-a lang pha chinah pariat an awm. IIT Bombay chu 43-na a ni a, IIT Kharagpur chu 51-na, IIT, Delhi chu 60-na, IIT Madras chu 62-na, IIT, Roorkee chu 65-na, IIT Guwahati chu 80-na niin, Jadavpur University chu 84-na a ni.

Ram hrang hrang zingah, China chu zirna hmun ṭha neih theih nana hma la nasa ber a ni a, World Class 2.0 programme duangin, kum 2020 khi chuan an rama university paruk chu khawvela zirna hmun ṭha ber ber nihtir a tum a, kum 2030 khi chuan 15 tal an lan theih nan a bei a ni. Hemi atan hian sum tam tak a ruahman a, khawvel mithiamte hip luh a, Chinese mi, ramdanga inzir chhuak thiam tak tak te, Chinese American mi≠thiamte chawkluh a tum a, a bikin science leh technology-ah sum leh pai a seng hnem hle.