Khiangte Construction Ṭhazual Gospel-a hma hruaitu Tumtumi 'Ka inchhuang ṭhin'
Khiangte Construction Ṭhazual Gospel chart tharah Mizo Idol intihsiakna aṭanga invawrh chhuak, aw ṭha tak leh zaithiam em em, C. Vanlalroluahtumi, Tumtumi tia hriat lar tak chuan 'Ka inchhuang ṭhin' tih hla hmangin hma a hruai.
'Ka inchhuang ṭhin' tih hla hi PC Lalneihtluanga phuah a ni a, Masky Records-ah recording hi tiin, music hi Forte Records kut chhuak a ni. Music video hi Moonshine Studio siam a ni bawk. YouTube lamah May 11, 2024 khan a dah chhuak a, a hla thu a ṭhain a satu Tumtumi zaithiam zia sawn nawn a ngai awm lo e, a video a mawi bawk a, thlir leh ngaihthlak a nuamin a khamawm lo ṭhin hle.
Ṭhazual Gospel chart No 2-ah Vanlalruati 'Halleluiah' a lang a, he hla hi C. Lalthlengliana phuah niin chart-ah pawh hian hun eng emaw chen a lanpui tawh a ni. Christina Vanlalnghaki 'Fapa sawm aia hlu' chu pathumnaa awmin, ani pawhin hma a rawn sawn zel. No 4-ah Divine Voice 'Malsawm ang che' tih leh, No 5-ah Dizie & Pekpeki 'A pui ang che' tihte an lang bawk.
Chart hmasaa lam, Seraphic Choir, Priscilla L Fanai leh Malawmi te pawh kan la hmu chhunzawm zel a, hetih lai hian gospel artist mipa zinga langsar pahnih, Ngurthangvela leh Zorinsanga Sailo-te chuan an hla thar nen chart-ah an rawng lang thar ve bawk a ni.