Lehkhabu bawm: 'T. Lalnunzama Hlate' tlangzarh
Mizo hlaphuah thiam T. Lalnunzama hla phuah hrang hrang dahkhawmna 'T. Lalnunzama Hlate' tih lehkhabu chu nimin khan Art & Culture minister C. Lalsawivunga'n Aizawl Press Club-ah a tlangzarh.
T. Lalnunzama hian fakna hla, lengzem, lenglawng leh khawhar hla hrang hrang a phuah a, a hla phuah lar zual ṭhenkhatte chu - 'Rawl lai ka D', 'Kar mah hla se', 'Zan tin mangṭha', 'Val lai kham lo zuapa', 'Pipute thuro chhiah' tihte a ni. 'T. Lalnunzama Hlate' tih lehkhabuah hian hla chi hrang 217 dah a ni a; Rs 250 man a ni.
Minister C Lalsawivunga chuan, ziakmi te leh zaimite chu an thiamna leh theihna hmanga ram leh hnam tan theihtawp chhuah zel turin a chah a, "Ram leh hnam hmasawnna leh hnam rohlu vawnhimnaah in pawimawh hle," a ti a; ei leh in, zuk leh hmuamah insum theihna neia invawng turin ziakmi leh zaimite a chah bawk.