Box Office-ah 'Twisters' thawm a ring ber

Action-adventure sequel 'Twisters' chu North American box office-ah a thawm a ring ber a, tlangzarh karah USD mtd 80.5 zet a la lut thei.

Glen Powell, Daisy Edgar-Jones leh Anthony Ramos te channa, 'Twisters' hi July 19, 2024-ah tlangzarh a ni a, US-ah theater 4,100-ah chhuah niin, tlangzarh kara a sum hmuh hi an lo chhut lawk aiin USD mtd 30 zetin a tam. Natural disaster film zingah US-a opening weekend-a che ṭha ber niin, kum 2004-a USD mtd 68.44 la luttu, 'The Day After Tomorrow' chu a rawn khum a ni. Hei bakah hian kumin chhunga US-a opening weekend-a film che ṭha pathumna a ni pha bawk a, tlangzarh kara sum hmuhah 'Inside Out 2' leh 'Dune: Part Two' te chauh a pha lo.

Critics review leh audience score pawh a hmu ṭha hle a, country music soundtrack-a Luke Combs, Chris Stapleton leh Miranda Lambert-te hla pawhin a vawrh kang hle bawk. Lee Isaac Chung-a direct, 'Twisters' hi a orginal 'Twister' tihchhuah aṭanga kum 28 hnuah siam a ni a, Oklahoma-ah chan a ni. 1996-a 'Twister' an siamah hian Bill Paxton leh Helen Hunt an chang a, hei pawh hi box office-ah a hit hle a, opening weekend-ah USD mtd 41 a la lut thei a, hemi kuma film chhuah zinga sum la lut tam ber dawttu a ni pha a, khawvel puma a sum hmuh chhuah hi USD mtd 500 a tling a ni.

'Twisters' hi a thawm rawn ring viau mah se, tunkar Zirtawpni hian Marvel Studio thar ngaihven hlawh tak, 'Deadpool & Wolverine' tlangzarh a nih tawh dawn avangin No 1 dinhmun a hauh chhunzawm zel thei dawn em tih hriat a chakawm hle.