A hla tharin Bethsy rilru a khawih

Mahni hla duh tak mai leh rilru hneh em emtu thiam taka sak tluka nuam leh hlawkthlak a vang hle ang. Bethsy-i pawhin a hla thar siam, MDM-a tunhnaia a dah chu a hla duh a ni a, a nalh a tih bawk a ni a, a rilru a khawih.

Bethsy hian kar kalta khan MDM-ah 'Min hmangaih si' tih hla a dah a, Zonet lamah chuan kan hmu tawh a, thingtlang lamah MDM hian a la pe chhuak chiah lo a, tunkar hi chuan an en ve thei tawh ngei ang. He hla, Bethsy-i music video thar hi hla phuah thiam leh musician C. Lalzarmawia phuah a ni a, a recording studio, CTC-a record leh music pawh hi amah ngeiin a duh ang taka a siam a ni. Hei vang hian a music pawhin belhchian a dawl hle a, a hla nen a inrem nalh khawp mai. Video thung hi chu M Space kutchhuak a ni.

"A pumpuiin he hla hi a ṭha ka ti em em vek a, hringnun kan zinkawng, kawng harsa leh nuam pawh nise, Pathian rinawmzia tarlanna ni a, a hla thu hian min hneh em em a ni. Chang tin mai hian keimah min pawl niin ka hria a, chang tin mai hian ka tan thuchah a hran ṭheuh an keng niin ka hria," tiin Bethsy-i hian a hla thar chungchang hi a sawi. "Australia-ah pawh khan ka sa tawh a, a ngaithlatu tam ber khan Lusei ṭawng an hre lo a, Lai leh Chin an ni. A thu awmzia pawh an hre mang lo a, chuti chung chuan an duhin an ngaithla ning mang lo a, a thu awmzia ka hrilh hnu phei chuan an thinlung a khawih em em a ni," tiin he hlain mi thinlunga hna a lo thawh tawh dan a sawi bawk. "A thlûk hrim hrim pawh hi a ṭha a, a mawi ka ti. Devotional song a ni a, a inhmehin, a hla thu leh a thlûk kal dan pawh a dikin a inrem hle a ni," a ti.

'Min hmangaih si' hla hi nikum August thla, Australia-a a kal hma aṭang tawha a lo buaipui tawh kha a ni a, a inup chhung a rei bawk a, a tho ṭha hle turah ngai ang. Hla ṭha a ni a, a satuin a thiam a, a nalh bawk.

Bethsy-i hian video siam zeuh zeuh reng a tum chho a, kumin chho chuan Bethsy-i hming kan lam nasa lehzual ngei ang. "Tunah hian video siam tur dang pahnih ka nei mek a, hengte pawh hi ka siam thuaiin ka ring. Pakhat hi Sap hla a ni nghe nghe," a ti. Hnamdang hla, ṭawng dang hla a sak thiamzia kan hriat kha. Kokborok ṭawnga a hla sak pawh, a awmze hre mang lo mah ila, kan zingah a larin a hit em em tho.