Katy-i pain a fanu a hmangaih reng

A nu leh pa pastor ve ve an ni a, mahse an fanu erawh chu love song satu lar leh hlawhtling berte zinga mi. A nungchang avangin Katy Perry hi "Devil's Child" tiin an ko ṭhin a, mahse hetiang hian sawi mah se, Katy Perry-i pa, Keith Hudson chuan a fanu hi a chhuanga a la hmangaih reng a, a hmangaih deuh deuh a ni.

Super Bowl-a a zai turah a fanu a chhuang tih Keith Hudson chuan a sawi a, a zai hunah chuan nasa takin a au ang tih a sawi bawk.

Keith chuan, "Mi tam tak chuan hetiang fanu ka neih avang leh, hetianga puitling chhoa ka enkawl avang hian engtin nge thu ka la hril ngam cheu le tiin min zawt ṭhin. Mi 20,000 chuang zet an punkhawmna a concert-ah ka kal a, ka thlir a, ṭhangtharte khawsakzia ka en a ni. Biak in ang mai niin ka hria a, ka ṭhu hnawk a, ka ṭap zawih zawih a ni. Thil dik lo, biak loh tur an bia a, thil dik lo hmaah an kûn a ni," a ti.

Katy Perry nu, Mary Hudson chuan, "Setana hian tleirawl leh ṭhalaite hi nasa takin a bei a, anmahni chauh chuan Setana beihna hi an hneh lo nasa si, nu leh pate hi Pathianin thuneihna min pek hmangin an zingah kan tel a ngai a ni. Anmahni chauh chuan kawng dikah an ṭhang lian thei lo," tiin a sawi bawk.

Khawvelah tlân mah se, a naupanlai aṭanga a ṭhanlenpui thil tam tak a awm. Elle chanchinbuin Katy Perry an kawmnaah, "Depression ka nei nasa ṭhin a, chuta ṭanga ka chhuahna chu Sam 113:9 thu a ni. He châng hi Pathianin min pe a, ka nuna kim lo he châng hmang hian min kawhhmuh a ni," tiin a lo sawi tawh a ni.