Casting Crowns An lal lukhum a chhah belh

Contemporary Christian music huang chhunga band hlawhtling berte zinga, Casting Crowns album, Until The Whole World Hears chu RIAA chuan Platinum a certify leh ta reng mai. Hei hian he rock band hlawhtlinzia a tarlang a, Kristiante huang chhungah chauh ni loin, secular khawvelah pawh band hlawhtling an ni tih a lantir.

Until The Whole World Hears album hi Casting Crowns album thar a ni hran lo a, kum 2009-a an tihchhuah daih tawh kha a ni. He album-ah hian an zai chauh ni loin, Pathian, Isua leh chhandamna chungchang sawihona te an telh a, Chanchin Ṭha hrilna ṭangkai tak a ni. Hemi hnu hian album hlawhtling tak tak an tichhuak leh tawh hlawm a, Thrive album chu Billboard 200-ah pawh a lang pha a, hemi hmaa an tihchhuah, Come To The Well phei chu Billboard 200-ah pakhatna a hauh thei hial a ni.

Thrive album hi Christian/Gospel Neilson SoundScan-in a chhinchhiah dan chuan kum 2014 chhunga Kristian album hralh kal ber a ni a, a hla reng reng a ṭha a, music a variety a, a nalh a, a ngaihnawm hle a ni. Casting Crowns hian January 24 khan New York-a Carnegie Hall-ah an zai a, ticket an siam zawng zawng an hralh zo vek hial a ni. Hetah hian zaipawl member 275 zetten orchestra bu tê (chamber) nen an rempui bawk.

RIAA certification-ah chuan, copy nuai 5 hralh chinah Gold pek an ni a, copy maktaduai khatah Platinum pek an ni. Copy maktaduai hnih an hralhin Double Platinum an ti a, copy maktaduai 10-ah Diamond an pe ṭhin. Casting Crowns hian music khawvelah hlawhtlinna tam tak an lo chang tawh a, GMA Dove Awards ngawt pawh 17 an dawng tawh a, Billboard Music Awards pahnih an dawng tawh a, American Music Awards pawh pathum lai an la tawh.