TBC Zaithanpuia Ṭhazualah a rawn ding chang
Pensy-in hma a hruai a, a zaithiam dan te, Zoram mipuiin kan ngaihsan dante thlirin pakhatnaah hei aia rei hi a la din a rinawm viau a, mahse beisei loh deuhin TBC Zaithanpuia'n hma a rawn hruai.
TBCA hi beisei loh tih hian a thiam lo tihna ni loin, beisei aia hmain pakhatna a rawn hauh. TBCA hian 'Fak Zel Che Ka Duh' tih hla hmangin Dafodils Ṭhazual 10-ah hian pakhatna a rawn ni a, Pensy-i hi pathumnaah a chhuk thla ta daih. Pensy-i ngam lohte hi Lunglei lam chhuak ve ve tho an ni - TBCA leh Temi Sailo te.
'Fak zel che ka duh' tih hla hi November 10 aṭang khan Dafodils Ṭhazual 10-ah a rawn lang ṭan a, pakuanaah bil a rawn ṭan. December thla a kai chhoh kha chuan he hla hi top 5-ah a lang tawh a ni. Kum a thar a, Dafodils Ṭhazual Fakna chhuak hmasa berah khan pahnihnaah a rawn lang a, January 19-ah khan pahnihnaah bawk a awm leh a, tunah chuan pakhatnaah a rawn invawrh chho ta.
Pahnihnaah Temi Sailo hla, 'Kraws thu' a awm a, he hla hi Temi hian a hlawhtlinpui chho dawn a nih hmel. Temi Sailo hi Aizawl BCM Choir-a tel a ni a, amah pawh a zaithiam. A hmain Rev Killuaia hla sain, kha kha music video-a vawi khat a lanna a ni. Hma a sawn chak viau a, pakhatna pawh hi a la luah hial mai thei.
Pensy-i chu pakhatna aṭangin pathumnaah a chhuk thla a, a tla thla zel ang em tih erawh sawi thiam a har. Album thar a tichhuak a, hemi hmang hian sang lehzualah a la rawn invawrh ngei a rinawm bawk. Maggie-i pawhin hma a rawn sawn chak viau a, parukna aṭangin palinaah a hmel kan hmu. Hmingtea leh Sailo Nutei te a ngai, panganaah bawk an la awm. Top-ah a hmasaa mi vek an la awm e.
Dafodils Ṭhazual Fakna 10
1 TBC Zaithanpuia – Fak zel che ka duh
2 Temi Sailoi - Kraws thu
3 Pensy - Chhan tlak ka ni em ni
4 Maggie - Hmangaihna par tlanin
5 Hmingtea & Sailo Nutei – Kir leh rawh
6 Lalhlumawii - Lei leh van siamtu
7 Lancy - Min hruai zel ṭhin
8 Angela Lalremtluangi - Min hrilh fo rawh aw
9 Vanlalsailova - Ka hawisan phal tawh lawng
10 Bethsy & TBC Zaithanpuia - Isua ka ṭhian a ni