American Sniper a la kap fuh tluang zel

Clint Eastwood-an a tak tak behchhana film a siam chu a la hlawhtling zel a, kar tawp chhung khan US-ah chuan ticket hralhna aṭanga sum lalut hnem ber movie a ni leh. American Sniper film hian kar tawp chhung khan $mtd31.9 lai a lalut thei.

American Sniper hian a zawnin hapta thum chhung box office-ah hian pakhatna a hauh tawh a, kar tawp kha Super Bowl a nih avangin a sum lakluh hi hniam rawk tura ngaih a ni sa hrim hrim a, mahse a nghawng na lutuk lo. US-ah chuan American Football kan tih hi an lawm a, Super Bowl hi intihsiakna pui a ni a, he hunah hi chuan kawtthler pawh a reh ṭhup thei. Super Bowl hian TV aṭanga entu maktaduai 100 chuangte a nei ṭhin.

Super Bowl awm ṭum kar tawp chhunga sum lalut hnem ber a rawn a ni a, a hmaa sum lalut hnem ber chu Miley Cyrus channa, Hannah Montana/Miley Cyrus: Best of Both Worlds Concert Tour kha a ni a, kha khan $mtd31.1 a lalut.

Pahnihnaah family movie an tih ang chi, Paddington a awm a, pakhatna nena an sum lakluh a inthlau hle. Paddington hian kar tawp chhung khan $mtd8.5 chauh a la lut. Pathumnaah Project Almanac a awm a, palinaah Black or White a awm bawk. Almanac hi sci-fi a ni a, Black or White-ah hian Kevin Costner a chang.

Box office movie:
"American Sniper" - $mtd31.9
"Paddington" - $mtd8.5
"Project Almanac" - $mtd8.5
"Black or White" - $mtd6.5
"The Boy Next Door" - $mtd6.1
"The Wedding Ringer" - $mtd5.7
"The Imitation Game" - $mtd5.2
"Tak3n" - $mtd3.6
"Strange Magic" - $mtd3.4
"The Loft" - $mtd2.9