Reverse Tragedy-in hlawhtlinna an chang
Mizoram rock band-in Guwahati-a hlawhtlinna chang leh, India rama band 20 thlan chhuah bikte zinga a chungnung ber an hauh thei hi lawmpui loh chi a ni lo ang. Reverse Tragedy chu tunhnaia IIT Guwahati-a Alchering Rock O Phoenix-ah pakhatna an ni.
Pakhatna ni thei tur hian Reverse Tragedy hian an bei nasa a, an thawhrimna rah an seng a ni. Nikum khan an tel tawh a, mahse top 5 bak an thleng lo. Kuminah an bei ṭha leh a, pakhatna an ni ta. He intihsiakah hian India rama band hrang hrang za chuangin demo an thehlut a, chung aṭang chuan a ṭha zual 20 an thleng chhuak a ni.
Band ṭha 20 thlan chhuahte hian Prelim an nei a, hei hi nikuma an paltlang tawh a nih avangin Reverse Tragedy hian an huphurh lo. An huphurh loh ang ngeiin an paltlang a, top 6 thlan chhuah zingah an tel a, tichuan pakhatna hi an hauh ta a ni. He intihsiaknaah hian judge zingah Australian extreme progressive metal band Ne Oblivicaris member-te an tel.
Reverse Tragedy hian progressive metal leh experimental rock an play a, an guitarist hi Bishal Gurung a ni a, vocals hi Chhuanawma niin, bassist hi Fela a ni a, Suraj-an drums a khawih a, Bimal-an keyboard a chang.
Keyboardist Bimal hi hmun danga a awm avangin thla riat zet chu an play-ho tawh lo a, a hman hun an nghak a, a hman a, a theih veleh an inbuatsaih ṭan a ni. Inbuatsaihna hun an ngah hman lo, Bimal rawn haw hnuah hian, kar khat chhung vel chauh an inpuahchah hman. An hlawhtlinnaah an lawm hle a, an guitarist Bishal chuan, "Kan keyboardist nena thla riat hnua kan perform leh hmasak ber a ni a, 2015-a gig hmasa ber a ni bawk. Inpuahchahna hun kan nei ṭha lo chungin hetiang hlawhtlinna kan chang hi kan lawm em em a, Pathian chungah kan lawm a ni. Kan chhungte ṭheuh leh min support-tu zawng zawng chungah kan lawm tak meuh meuh bawk," a ti.