Super Bowl-ah Katy Perry a che ropui hle

Pathianni khan Super Bowl XLIX (49-na) khelh a ni a, he huna show ropuiah Katty Perry a che ropui a, sawi zui hlawh. US-a chanchinbu lian hrang hrangten an chhuah lansarh berte zinga mi a ni.

Super Bowl halftime show-ah hian Katy Perry hian a hla hit tak tak a medley a, a nalh phian a, mipui lawm a hlawh. Sakeibaknei leh nghahringei (shark) a rawn dinchhuahpui chuan sawi a hlawh a, ropui titu an tam. Super Bowl-ah hian New England Patriot leh Seattle Seahawks te an inkhel a, an inkhelhna hi Arizona-a Glendale khuaa University of Phoenix Stadium-ah a ni.

Katy hian a hla hit Roar a rawn sa a, hetah hian sakeibaknei lem, lian mangkheng, mechanical lion chungah a rawn chuang a, Dark Horse-in a chhunzawm leh. I Kissed A Girl-in a chhunzawm leh a, hetah hian rocker ropuite zinga mi Lenny Kravitz chuan a rawn zawm. Teenage Dream leh California Gurls a sak laiin thawmhnaw rawng lar tak a rawn inbel a, a dancer pahnih chuan shark costume an rawn inbel.

Hemi hnu hian Missy Elliot a rawn chhuak a, ani hian ama hla, Get Ur Freak On leh Work It te a rawn sa; hetih lai hian Katy hi Firework hla sa turin a inbuatsaih a ni. Fireworks sa turin a rawn chhuak a, shooting star-ah a rawn chuang a, mipui chungah a thlawk kual a, mipuiin an lawm hle.

Tun Super Bowl-ah hian Idina Menzel leh John Legend te pawh an zai a, headliner erawh Katy Perry a ni. Idina Menzel hian US hnam hla, The Star-Spgled Banner hla a sa a, John Legend hian America the Beautiful hla a sa.

Ṭan tak tak hma hian pre-Super Bowl party neih a ni a, heti lamah hian Rihanna te, Kanye West te an inlan thung. Rihanna hian a hla hit Stay a sa a, We Found Love, Rude Boy leh Umbrella te a sa bawk. Rae Sremmurd nen No Type an sa dun leh bawk. Kanye West hian Ni**as in Paris, Black Skinheads leh, a fanu, North West tana a phuah, Only One te a sa.

Super Bowl hi National Football League hnuaia intihsiakna ngaihhlut ber a ni a, final a ni ber. NFL hnuaiah hian conference pahnih - American Football Conference leh National Football Conference te an awm a, chuta champion te chu Super Bowl-ah hian an intum ṭhin. Kumin hian New England Patriot leh Seattle Seahawks te an intum a, Patroits hi an chak zawk a ni. Entu an tam hle ṭhin a, US-a TV-a pek chhuah programme-a entu ngah ber ber pali hi Super Bowl a ni. Sporting event-ah pawh entu tam ber dawttu a ni. Sporting event-a entu ngah ber chu UCL Champions League final a ni a, a dawtah Super Bowl hi a ni.

Tun Super Bowl hi TV aṭangin mi maktaduai 115 velin an en a, chu chu America-a mihring pathum zela pakhatin en ang an ni.