Khawvel Hmeichhe zinga ngaihsan ber Jolie

Most Admired Woman thlan chhuahah Angelina Jolie chu pakhatnaa thlan a ni. Top 10-ah hian politics lam kaihhnawih aṬanga hriat mi paruk an lang a, chung zingah chuan Aung San Suu Kyi pawh a tel

Remna leh muanna a awm nan hna a thawk nasa a, harsatna leh buainain a tuam vel mi sang tam takte a ṭanpui nasa. Hei vang hi a ni ngei ang, Angelina Jolie chu Most Admired Woman-a thlan a ni.
Angelina Jolie kan hria a, film a chan thiamzia pawh kan hria. Hemi piah lamah, a mihringpuite tan hna nasa takin a thawk a ni. Khawvel ram rethei zawka mite nasa takin a ṭanpui a, a inpekna leh a thawhrimna avangin UN chuan raltlante hnena a palaiah a hmang ta hial nghe nghe.
Most Admired Woman hi YouGov! kaltlanga thlan a ni a, khawvel ram 23 aṭangin vote-a thlan a ni. Hetah hian Pakistan hmeichhe tleirawl, hmeichhiate zinga zirna tilar a, chumi avanga Taliban ten an kah, Nobel Peace Prize winner, Malala Yousafzai pawh a hming a lang a, mahse Jolie hi ngaihsan bera thlan a ni ta tho.
Hmeichhe lar leh thiltithei tak tak hming a lang nual hlawm. Yousafzai bakah hian Hillary Clinton, Queen Elizabeth II, Michelle Obama te pawh an lang. Musician zingah Celine Dion a lang a, Oprah Winfrey leh Julia Roberts te chu lang zinga khawvelin a hriat larte an ni.
UK bikah chuan lalnu Elizabeth-i chu ngaihsan ber a ni a, pahnihnaah Dame Judi Bench a awm. Duchess of Cambridge chu 5-naah a awm a, Aung San Suu Kyi chu paruknaah a lang. German Chancellor, Merkel-in a dawt a, a hnungah hian Hillary Clinton leh Michelle Obama te an awm leh.