Ebola virus a inthlak danglam

Africa aṭanga chhuak Ebola natna hrik, a virus inthlak danglam chuan scientist-te lu a tihai hle a, natna kai awlsam lehzualah a inthlak danglam (mutate) ang tih an hlau.

Virus-ho hi an inthlak danglam thei hrim hrim a, Ebola hi kai awlsam zawnga a danglam a nih hlauh chuan a hlauhawm lehzual hle dawn a ni. Ebola hi tunah hian mi 22,000 zetin an kai tawh a, Guinea, Sierra Leone leh Liberia-ah te chuan mi 8,795 ten an thihpui tawh a ni.

Feren rama Institut Pasteur-a researcher-te chuan Ebol virus hi uluk takin an zir chiang mek a, he hmun hi Ebola hri a leng tih finfiahtu hmasa ber kha an ni. Ebola virus hi uluk takin an zir chiang a, a inthlak danglam dan te an chhui mek a ni. Institut Pasteur-a geneticist, Dr. Anavaj Sakuntabhai chuan, "He virus hi nasa takin a danglam thei tih kan hria a, thihpui hlauhawm loh zawka a inthlak thei a, chutihrual chuan kai chhawn awlsam zawkah pawh a inthlak danglam ang tih kan hlau hle a ni," a ti.

Ebol virus hi RNA virus a ni a, HIV leh influenza te pawh hi RNA virus an ni a, an inthlak danglam theihna a nasa em em. Scientist-tena an hlauh chu Ebola virus hi tunah chuan a kai taksa leh midang taksa insik aṭanga inkaichhawn a ni ber a, boruaka hrileng thei angah a inthlak ang tih hi a ni.

Hetihlai hian Prof. David Heyman chuan, "Thisena awm chi virus, entir nan HIV leh Hepatitis B te inthlak danglam danah boruaka leng tur ang chi emaw, chutiang lam hawia awm palh thei tur ang pawhin an danglam lo. Boruaka leng tur chia insiam danglam tur chuan mutation nasa tak a awm a ngai ang," a ti.

Institut Pasteur-a mi virologist, Noel Tordo chuan, "Tunah rih chuan he virus ṭhan dan hi kan la hre tlem hle a, nasa lehzual zawka zir kan la ngai. Mahse an insiam danglam ngei tih erawh a chiang a ni," a ti.